Izraıl shabýyldarynan qaza tapqandardyń 65 paıyzy áıelder men balalar

GAZA. KAZINFORM — Izraıl shabýyldarynan qaza tapqandardyń 65 paıyzyn áıelder men balalar sondaı-aq qarttar, dep habarlady Anadoly agenttigi Gaza sektoryndaǵy úkimettiń baspasóz qyzmetine silteme jasap.

Jarııalanǵan málimdemede ızraıl áskeri Gazanyń beıbit turǵyndaryn ádeıi nysanaǵa alyp, júıeli genotsıd júrgizip jatqany atap kórsetilgen.

Bar derekterge súıensek, qaqtyǵystar bastalǵaly beri 18 myńnan astam bala jáne 12 400-den astam áıel mert bolǵan.

Budan bólek, Izraıl áskeriniń soqqylary nátıjesinde 2 180 otbasy tolyǵymen joıylǵan, al 5 070 otbasynda tek bir ǵana tiri qalǵan adam bar.

Baspasóz qyzmetiniń málimetinshe, qaza tapqandardyń qatarynda 1 400-den astam medıtsına qyzmetkeri, 113 azamattyq qorǵanys qyzmetkeri, 212 jýrnalıst, 750-den astam gýmanıtarlyq uıym ókili, 13 myń stýdent, 800 muǵalim men bilim salasynyń qyzmetkeri, sondaı-aq 150 ýnıversıtet oqytýshysy men ǵalym bar.

Málimdemede bul derekterdiń halyqqa baǵyttalǵan júıeli shabýyldardy dáleldeıtini aıtylǵan.

Gaza úkimeti halyqaralyq qaýymdastyq pen sot organdaryn Izraıldiń bul áreketterin dereý aıyptaýǵa jáne onyń basshylyǵyn beıbit turǵyndarǵa qarsy jasaǵan qylmystary úshin jaýapqa tartýǵa shaqyrdy.

Buǵan deıin habarlanǵandaı, Gaza sektorynda 51 355 adam qurban boldy.