Izraıl palestınalyqtardy kúshtep kóshirý isi boıynsha aıyptaldy – Human Rights Watch
ASTANA. KAZINFORM – Human Rights Watch uıymy Izraıldi áskerı qylmystar, etnıkalyq tazartý jáne adamzatqa qarsy qylmystar jasady dep aıyptady. Bul týraly quqyq qorǵaý uıymynyń beısenbi kúni jarııalanǵan arnaıy baıandamasynda aıtylǵan, dep habarlaıdy Kazinform.
Numan Rights Watch dereginshe, 2025 jylǵy qańtar-aqpan aılarynda júrgizilgen «Temir qabyrǵa» operatsııasy kezinde Iordan ózeniniń Batys jaǵalaýyndaǵy Djenın, Týlkarm jáne Nýr-Shams palestınalyq lagerleriniń shamamen 32 myńǵa jýyq turǵyny kúshtep úılerinen shyǵarylǵan. Arada on aı ótkenine qaramastan, olardyń eshbiri qaıta orala almaǵan, al júzdegen ǵımarat qıraǵan kúıi tur.
105 betten turatyn «Meniń barlyq armanym kúıredi: Izraıldiń Iordan ózeniniń Batys jaǵalaýyndaǵy palestınalyqtardy kúshtep kóshirýi» atty esepte ızraıldik áskerı bólimshelerdiń úılerdi tintip, turǵyndarǵa qonystaryn tastaý týraly buıryqty drondar arqyly habarlaǵany, al býldozerlerdiń ǵımarattardy súrip tastaǵany jazylǵan. Kóshirý oryndarynda qalǵan adamdar týystarynyń úılerine, meshitter men mektepterge bas saýǵalaýǵa májbúr bolǵan.
Uıym zertteýshisi Mılena Ansarıdiń Reuters agenttigine aıtýynsha, birde-bir otbasy týǵan úıine qaıta kire almaǵan. Izraıl armııasy ınfraqurylym «qarýly toptar qoldanbas úshin» qıratylǵanyn aıtqanymen, turǵyndardyń qashan qaıta orala alatyny týraly málimet bermegen.
In early 2025, the Israeli military launched an operation that emptied three Palestinian refugee camps. They've blocked their residents from returning and razed many of their homes.
— Human Rights Watch (@hrw) November 20, 2025
In a new report, HRW finds that Israeli forces carried out war crimes, ethnic cleansing and… pic.twitter.com/I13LBojozU
Human Rights Watch spýtnıktik sýretterdi, súrý týraly buıryqtardy jáne derekkóz vıdeolaryn zertteı kele, 850-den astam nysannyń joıylǵanyn, al BUU baǵalaýy boıynsha bul san 1460 ǵımaratqa jetetinin málimdedi.
Uıym Izraıl resmı ókilderi operatsııanyń «terrorıstik elementterge» qarsy baǵyttalǵanyn aıtqanymen, jappaı kóshirý men turǵyndardyń keri oralýyna tyıym salýdyń sebepteri túsindirilmegenin atap ótti. Bul oqıǵa Gaza sektoryndaǵy soǵysqa qatysty halyqaralyq nazardyń artqan shaǵynda oryn alǵan.
Human Rights Watch birqatar el úkimetterin ızraıldik sheneýnikterge jeke sanktsııalar engizýge, qarý-jaraq satýdy toqtatýǵa, saýda jeńildikterin joıýǵa, qonystarda óndirilgen taýarlardy ımporttaýǵa tyıym salýǵa jáne Halyqaralyq qylmystyq sot orderleriniń oryndalýyna qoldaý kórsetýge shaqyrdy.
Uıym jappaı kóshirýdi «etnıkalyq tazartý» dep atady. Bul termın zańdyq mártebege ıe bolmasa da, belgili bir etnıkalyq nemese dinı topty kúshpen qonystan shyǵarý áreketin sıpattaý úshin keńinen qoldanylady.
Aıta keteıik, Izraıl áskeri Lıvannyń ońtústigindegi eki eldi mekenge soqqy jasamaq.