Izraıl mınıstri evreılerdi Gazaǵa qonystandyrýǵa shaqyrdy
ASTANA. KAZINFORM – Izraıldiń turǵyn úı mınıstri Itshak Goldknopf basyp alynǵan Gaza sektoryna evreılerdi qonystandyrýǵa shaqyrdy. Bul týraly Anadoly jazdy.
Izraıldik BAQ-tyń habarlaýynsha, Goldknopf Gaza shekarasynda «Nahalot» uıymynyń negizin qalaýshy Danıela Vaıspen kezdesý ótkizdi. Ol basyp alynǵan Palestına aýmaqtarynda – Batys jaǵalaýda, Shyǵys Ierýsalımde, Golan bıikterinde jáne Gazada ızraıldik eldi mekenderdi qurýdy qoldaýymen tanymal.
Kezdesý barysynda Vaıs jáne onyń seriktesteri mınıstrge Gaza sektorynyń ártúrli aımaqtarynda evreılerdi ornalastyrý úshin eldi mekender salý josparlanǵan aımaqtardy kórsetetin kartany tabys etken.
Áleýmettik jelidegi málimdemesinde Goldknopf evreılerdi Gazaǵa qonystandyrý 7 qazandaǵy oqıǵalarǵa, sondaı-aq Halyqaralyq qylmystyq sottyń premer-mınıstr Benıamın Netanıahý men burynǵy qorǵanys mınıstri Ioav Galantty tutqyndaý orderine «jaýap» bolatynyn atap ótti.
Buǵan deıin osyndaı usynysty Ulttyq qaýipsizdik mınıstri Itamar Ben-Gvır men qarjy mınıstri Betsalel Smotrıch jasaǵan bolatyn, olar da Izraıl úkimetindegi ásire ońshyl qanattyń ókili.
Aıta keteıik, Izraıl Halyqaralyq qylmystyq sottyń sheshimine qarsy shaǵym túsirdi.
Gaza sektorynda mert bolǵan adamdar sany 44 myńnan asty.