Izraıl HAMAS-pen úzilis týraly kelisimdi uzartýy múmkin: Netanıahý vıdeoúndeý jasady
Izraıl premer-mınıstri Bınıamın Netanıahý kúninen 10 ızraıldik tutqyn bosatylatyn bolsa, Gaza sektoryndaǵy tórtkúndik gýmanıtarlyq úzilisti taǵy uzartý múmkindigin quptaıtynyn málimdedi. Kazinform bul týraly Anadoly aqparat agenttigine silteme jasap habarlady.
Bınıamın Netanıahý AQSh prezıdenti Djo Baıdenmen telefon arqyly sóıleskennen keıin vıdeoúndeý jasap, osylaı dep aıtty.
Premer-mınıstrdiń málimdeýinshe, ol AQSh prezıdentine Gazadaǵy áskerı qımyldarǵa «bar kúshimen» qaıta oralýǵa nıetti ekenin habardar etken.
Onyń sózinshe, Izraıl «HAMAS-ty joıýdy», tutqynǵa alynǵandardyń bárin qaıtarýdy jáne Gazanyń «burynǵy kúıge oralmaýyn» qamtamasyz etýdi maqsat etip otyr.
Bul rette HAMAS ókilderi de kóbirek tutqyndy bosatý úshin Izraılmen gýmanıtarlyq úzilisti uzartýǵa nıetti ekenin málimdedi.
Izraıl men HAMAS arasyndaǵy qaqtyǵysqa tórtkúndik gýmanıtarlyq úzilis týraly bitim juma, 24 qarasha kúni jergilikti ýaqyt boıynsha tańǵy saǵat 07:00-de kúshine engen bolatyn.
Bitim Izraıl túrmelerindegi 150 palestınalyq tutqyndy HAMAS ustaǵan 50 ızraıldikke aıyrbastaýdy qarastyrady.
Bostandyqqa shyǵarylatyndar arasynda eki jaqtan da áıelder men balalar bar. Qazirgi ýaqytta kelisim aıasynda Gaza sektorynda ustalǵan ızraıldik 39 áıel men bala, sondaı-aq Izraıl túrmelerindegi 117 palestınalyq áıel men bala bosatyldy.
Eske salaıyq, Palestınalyq HAMAS toby 7 qazan kúni Izraılge shabýyl jasap, mýzykalyq festıval ótip jatqan jerden kóptegen adamdy kúshtep áketken bolatyn. Tutqynǵa alynǵandar arasynda Qytaı men Taıland azamattary da bar ekeni aıtyldy.
22 qarashada Izraıl men HAMAS tutqyndardy bosatýǵa, soǵysty ýaqytsha toqtatýǵa keliskenin jazdyq.
Tutqyndardyń alǵashqy legi 24 qarashada bosatyla bastady. Olar Taılandtyń 12 azamaty ekeni aıtyldy.
Keıinnen HAMAS taǵy 13 ızraıldikti erkine qoıa berdi. Oǵan jaýap retinde Izraıl 39 palestınalyq tutqyndy jiberdi. Sonymen qatar Taılandtyń taǵy tórt azamaty bosatyldy.
Búgin HAMAS Qyzyl Krestke ızraıldik tutqyndardyń úshinshi tobyn tapsyrǵany málim etildi.
