Izraıl Gaza sektoryna qurlyqtan basyp kirýge daıyndyq ústinde
Benıamın Netanıaýddiń málimdeýinshe, Izraıl Gaza sektoryna qurlyqtan basyp kirýge daıyndyq júrgizýde. Alaıda shabýyl qashan jasalatyny belgisiz. Kazinform agenttigi bul týraly Financial Times-qa silteme jasap habarlaıdy.
Izraıl kóshbasshysy sársenbige qaraǵan túni teledıdar arqyly halyqqa sóılegen sózinde HAMAS sodyrlarymen «jerde, jer astynda, Gazada jáne odan tys jerlerde» kúresýge ýáde berdi, biraq qurlyqtaǵy operatsııanyń qashan bolatynyn aıtpady.
«Biz - jaryqtyń, al olar qarańǵylyqtyń uldary», - dedi Netanıahý.
Onyń bul sózderi Izraıl áskerleriniń Gaza sektorymen shekaraǵa keń kólemde ornalastyrylýy jáne AQSh-tyń aımaqtaǵy áskerı kúshteriniń ulǵaıýy aıasynda aıtyldy.
«Biz qurlyqtaǵy shabýylǵa daıyndalyp jatyrmyz», - dedi tek qara kıingen Netanıahý ızraıldikterge sóılegen sózinde.
«Men qashan, qalaı jáne qansha (sarbaz) bolatynyn naqtylamaımyn», - dedi ol.
Netanıahý qurlyq shabýylynyń ýaqyty áskerı kabınettiń biraýyzdan qabyldanǵan sheshimimen anyqtalatynyn aıtty.
«HAMAS-tyń barlyq músheleri óledi», - dedi ol.
Sondaı-aq Izraıl kóshbasshysy 7 qazanda HAMAS-tyń joıqyn shabýyldaryna ákelgen qaýipsizdik olqylyqtary muqııat tekseriletinin aıtty.
HAMAS sodyrlary Izraıldiń ońtústik shekarasyndaǵy eldi mekenderge basyp kirip, 1400 ızraıldikti óltirdi. Olardyń kóbi beıbit turǵyndar. Netanıahý bolǵan oqıǵaǵa da jaýapty bolatynyn aıtty.
AQSh prezıdenti Djo Baıden óz kezeginde ızraıldikter men palestınalyqtar arasyndaǵy «6 qazandaǵydaı» statýs-kvoǵa qaıta oralý bolmaıtynyn aıtty, dep habarlaıdy VVS.
Baıden buǵan deıin ótken baspasóz máslıhatynda Izraıl «beıbit turǵyndar shyǵynyn azaıtý» úshin jetkilikti áreket jasap jatyr ma degen suraqqa «palestınalyqtar aıtyp jatqan sandarǵa senimdi emes ekenin» atap ótti.
«Men palestınalyqtardyń qaza bolǵan adamdar týraly málimetteriniń qanshalyqty ras ekenin bilmeımin. Men jazyqsyz adamdardyń kóz jumǵanyna senimdimin, soǵystyń quny osy», - dedi Baıden sársenbide tilshilerge.
Osy arada Gaza sektorynda otyn taýsylyp, aýrýhanalar jedel járdem qyzmetinen basqasynyń barlyǵynyń jumysyn toqtatty. Izraıl Gaza sektoryna janarmaı jetkizýge tosqaýyl qoıdy.