Izraıldiń qurdymǵa ketýi múmkin be?» - BAQ-qa sholý
***
«Keshe Qazaqstan Respýblıkasynyń Prezıdenti Nursultan Nazarbaev Reseıge jumys sapary aıasynda Reseı Federatsııasynyń Prezıdenti Vladımır Pýtınmen kezdesti. Kezdesý barysynda Nursultan Nazarbaev atalǵan sapar buryn qol jetkizilgen ýaǵdalastyqtarǵa sáıkes jasalyp otyrǵanyn atap ótti», - dep jazady «Egemen Qazaqstan» gazeti búgingi sanyndaǵy «Qazaqstan-Reseı: Senimdi seriktestik barlyq baǵytta jalǵasady» degen taqyryptaǵy maqalasynda. Basylymnyń atap ótýinshe, memleket basshylarynyń kezdesýinde ózara is-qımyldyń aýqymdy máseleleri jónindegi ekijaqty yntymaqtastyqty nyǵaıtýdy jalǵastyrý, sondaı-aq 2013-2015 jyldarǵa arnalǵan birlesken is-qımyl josparyn odan ári iske asyrý týraly ýaǵdalastyqqa qol jetkizildi. Sonymen qatar, ıntegratsııalyq máseleler jónindegi ózara is-qımyldy jalǵastyrýǵa, atap aıtqanda, Birtutas ekonomıkalyq keńistikke jáne 2015 jylǵa qaraı Eýrazııalyq ekonomıkalyq odaqty qalyptastyra bastaýǵa baılanysty sheshim qabyldandy.
Keshe Premer-Mınıstr Serik Ahmetovtiń qatysýymen Ekonomıka jáne bıýdjettik josparlaý mınıstrliginiń keńeıtilgen alqa otyrysy bolyp ótti. Osy másele arqaý bolǵan maqala «Egemen Qazaqstan» gazetiniń búgingi sanynda «Indýstrııalyq damý jalǵasa beredi» degen taqyryppen berilgen. Jıynǵa qatysqan Úkimet basshysy mınıstrlikke tapsyrylǵan aǵymdaǵy jyldyń mańyzdy mindetterine toqtaldy. S.Ahmetov atap ótkendeı, onyń ishinde ekonomıka ósimin 6 paıyzǵa jetkizý jáne halyqty jumyspen qamtý eń basty mindetter bolýy kerek. Ol úshin áldeqaıda keshendi josparlar qabyldanyp, alda júıeli jumystar júrgizilýi tıis. Úkimet basshysy 2013-2017 jyldary ekonomıkalyq saıasat makroekonomıkalyq qamtamasyz etýge baǵyttalýy tıis ekenin de atap ótti. Osyǵan baılanysty elimizdiń ishki jáne syrtqy rynoktardaǵy jaǵdaıy men ekonomıkanyń damýyna jedel monıtorıng júrgizýdi jalǵastyrý tapsyryldy. Eń bastysy, Qazaqstannyń saýda áriptesteri bolyp tabylatyn Eýropa, Qytaı jáne basqa da memleketterdiń ahýaly nazarda bolmaq.
***
«AQSh-tyń barlaý qyzmeti qyzyqty málimet taratty. Barlaý qyzmetiniń sholýshysy Hýsseın ál-Berberı amerıkalyq bir basylymda óz boljamdaryn jarııa etti. Al bul málimettiń astarynda aqıqat bar ma, álde Izraıl bıligin saqtandyrý úshin jasalyp otyrǵan málimdeme me? Ol jaǵy belgisiz», - dep jazady «Aıqyn» gazeti búgingi sanyndaǵy «Izraıldiń qurdymǵa ketýi múmkin be?» degen taqyryptaǵy maqalasynda. AQSh-tyń Taıaý Shyǵys jónindegi barlaý qyzmeti departamentiniń zertteýine qaraǵanda, 2025 jyldary jáne odan keıin Izraıl memleketi bolmaýy múmkin. Bul boljamǵa qatysty Hýsseın ál-Berberı birqatar málimetter keltiredi. Atap aıtqanda, Izraıl memleketi joq jerden quryldy. Aldaǵy ondaǵan jyldarda qara kontınentten kóship barǵan jarty mıllıonǵa jýyq efıopııalyq evreıler men afrıkalyq ıýdeıler burynǵy otanyna qaıta oralýy múmkin.
Daýlasqandardy sotqa jetkizbeı, bitimge keltirý úshin elimizde buǵan deıin tórelik-arbıtrajdyq, aralyq sottar, sondaı-aq medıatorlar qyzmeti engizilgeni málim. Endi «bıler» rólin atqarý notarıýstarǵa da beriletin bolypty. Osyndaı qyzyqty jańalyq keshe Senatta ótken «dóńgelek ústelde» jarııa etildi. Bir aıta keter jaıt, qazaqstandyq joǵary bilim berý júıesi zań mamandaryn qaptatyp shyǵarǵany sonsha, respýblıkamyz «zańgerler eline» aınalyp ketkendeı bolǵan. Al osy jańa qurylymdar solarǵa jumys taýyp berýge jol ashqaly otyr. Bul jaıynda «Aıqyn» gazetiniń senbilik sanyndaǵy «Bılerge bılik beriledi» degen taqyryptaǵy maqalada baıandalǵan.
