Izraıl áskerıleri Gaza sektorynda kepilge alynǵan úsh adamnyń máıitin tapty
ASTANA. KAZINFORM — Gaza sektorynda kepilge alynǵan úsh adamnyń máıiti tabyldy. Olar Izraılge jetkizildi. Bul týraly Izraıl armııasynyń ókili málimdedi. Izraıl Djebalıdegi operatsııasyn jalǵastyryp, RAFAH-qa qaraı jyljyp keledi, dep jazady Euronews.
Gaza sektorynda ızraıldik áskerıler kepilge alynǵan úsh adamnyń – Itshak Gelernter, Amıta Býskıla jáne Shanı Lýktyń máıitin tapty, dep habarlady TsAHAL ókili.
Habarlamada úsheýin de 7 qazanda Nova festıvalinde sodyrlar jasaǵan qyrǵyn bolǵan jerde HAMAS ókilderi óltirgeni aıtylǵan. Sodyrlar máıitterdi Gazaǵa jetkizdi.
Shanı Lýk Izraıl men Germanııanyń azamaty bolǵan. HAMAS uıymy qyzdyń máıitin ashyq kólikpen anklav kóshelerimen tasymaldap jatqany túsirilgen vıdeony jarııalady. Sodan keıin bul sýretter búkil álemge tarady. Ata-anasy qyzdaryn kıimi men tatýırovkasynan tanydy. Ol kezde onyń tiri nemese óli ekeni áli belgisiz edi.
Izraıl armııasy Gaza sektorynyń soltústigindegi Djebalıı bosqyndar lagerinde HAMAS-qa qarsy operatsııasyn jalǵastyryp jatyr. Áskerıler munda birneshe kúnniń ishinde eki júzden astam sodyrdyń óltirilgenin aıtty.
Ondaǵan adam tutqynǵa alyndy. Anklavtyń ońtústiginde Izraıl armııasy HAMAS-tyń sońǵy tiregi sanalatyn Rafahqa qarsy shabýylyn jalǵastyryp jatyr.
Osy ýaqytta AQSh áskerıleri salǵan pırs arqyly Gazaǵa gýmanıtarlyq kómek kele bastady. BUU atap ótkendeı, bul joba óte mańyzdy, biraq ol anklav halqyn azyq-túlikpen, sýmen jáne otynmen qamtamasyz etý úshin qajetti jer asty qoryn almastyra almaıdy.
