Izraıl áskeri Gazanyń ortalyǵyna kirdi

  Izraıl Qorǵanys mınıstri Ioav Gallant Izraıl áskeri qazir Gaza qalasynyń ortalyǵyna jetkenin málim etti. Kazinform bul týraly VVS-ge silteme jasap habarlaıdy.

Gallant Izraıl Qorǵanys áskeri qurlyq, áýe jáne teńiz áskerimen birlesip qalaǵa soltústik pen ońtústikten shabýyl jasaǵanyn atap ótti.

Izraıl premer-mınıstri Bınıamın Netanıahý buǵan deıin sarbazdar Gaza qalasyn qorshaýǵa alyp, ishinde áreket etip jatqanyn málimdegen bolatyn. Sonymen qatar Netanıahý Gaza turǵyndaryn ońtústikke ketýge shaqyrdy.

Onyń dúısenbi kúngi «soǵystan keıin Gazadaǵy qaýipsizdik jaýapkershiligin Izraıl óz moınyna alady» degen málimdemesin seısenbi áskerı kabınetiniń múshesi túsindirdi.

Strategııalyq máseleler mınıstri Ron Dermerdiń «VVS búkilálemdik qyzmetiniń jańalyqtar saǵaty» baǵdarlamasynda aıtýynsha, Netanıahý Izraıl demılıtarızatsııalanǵan aımaqta anklavtyń saqtalýyn qamtamasyz etip, jańa lańkestik qaýip týyndasa, olarmen kúres operatsııalaryn júrgizetinin aıtqysy kelgen. Ol Izraıl bul aımaqty qaıta basyp alyp, basqarýǵa tyryspaıtynyn málim etti.

Buǵan deıin Gazanyń ońtústigindegi Han-ıÝnıs, Rafah jáne Deır-el-Balah qalalaryna áýeden soqqy jasaý saldarynan ondaǵan adam qaza tapqany habarlanǵan bolatyn.

HAMAS toby basqaratyn densaýlyq saqtaý mınıstrliginiń málimeti boıynsha, Gaza sektorynda 10 300-den astam adam óltirildi, onyń 4100-den astamy - bala. Izraılde 1400 adam óltirilip, 200-den astam turǵyn tutqynǵa alyndy.

Dúnıejúzilik densaýlyq saqtaý uıymy (DDSU) Izraıl men Gaza qaqtyǵysynda qaza tapqandar sany men qasiretke ushyraǵandardy tipti elestetý qıyn ekenin aıtty.

Uıym ókili Krıstıan Lındmaıer soǵys bastalǵaly medıtsına mekemelerine 100-den astam soqqy jasalǵanyn atap ótti.

BUU agenttiginiń ókili eki taraptan da mert bolǵandar sanyn aıtyp, qazir Gazada orta eseppen kúnine 160 bala óltirilip jatqanyn habarlady.

Izraıl turǵyndary keshe HAMAS tobynyń shabýyl jasaǵanyna bir aı tolǵanyn atap ótti.