Izraıl áskeri Gazany tolyǵymen qorshap, ekige bóldi
Izraıl áskerıleri óz áskeriniń Gaza qalasynyń ońtústigindegi jaǵalaý syzyǵyna jetkenin habarlady. Kazinform bul týraly BBC-ge silteme jasap habarlaıdy.
Izraıl armııasynyń ókili Danıel Hagarı buqaralyq aqparat quraldaryna Gaza sektoryndaǵy operatsııa týraly aqparat berdi. Onyń aıtýynsha, TsAHAL kúshteri Gaza qalasyn tolyǵymen qorshap alǵan.
Áskerler jaǵalaý syzyǵyna jetip, Gaza sektoryn «Soltústik Gaza» jáne «Ońtústik Gaza» dep ekige bóldi.
Ol Izraıl Gaza sektorynyń soltústiginde jáne úlken Gaza qalasynda qurlyqtaǵy shabýyl operatsııasyn jalǵastyratynyn aıtty.
Gaza sektoryndaǵy VVS tilshisi Rýshdı Abýalýftyń aıtýynsha, jeksenbi kúni keshke jasalǵan áýe shabýyldary Izraıl men HAMAS arasyndaǵy qaqtyǵys bastalǵannan bergi eń aýyr soqqy boldy. Onyń aıtýynsha, soqqylar Gazanyń soltústik-batysyna baǵyttalǵan. Ondaǵy Shatı lageri dep atalatyn bosqyndar lageri talqandaldy.
Batys jaǵalaýda ornalasqan Palestına avtonomııasynyń Densaýlyq saqtaý mınıstrligi Gazada turǵyn úıdiń 50%-dan astamy qıraǵanyn málimdedi. Gaza sektory halqynyń shamamen 70%-y qonys aýdardy. Naýqastardy qabyldaı alatyn 35 jergilikti aýrýhananyń 16-sy jumysyn toqtatty. Palestınalyq bosqyndarǵa kómek kórsetý jáne jumystardy uıymdastyrý jónindegi BUU Taıaý Shyǵys agenttiginiń 45 ǵımaraty zaqymdandy. Kem degende 7 shirkeý men 55 meshit búlingen.
HAMAS toby basqaratyn Gaza sektoryndaǵy densaýlyq saqtaý mınıstrligi 7 qazannan bastap Gaza sektorynda 9700-den astam adam qaza tapqanyn habarlady.