Ivan Dychko kásipqoı boksta alǵash ret jeńilip qaldy

ASTANA. KAZINFORM — Qazaqstandyq boksshy Ivan Dychko (15-0, 14 KO) amerıkalyq Djermeın Franklınmen (23-2, 15 KO) jekpe-jek ótkizdi.

Bul kezdesý Saýl «Kanelo» Alvares pen Terens Kroýford Las-Vegas (AQSh, Nevada shtaty) qalasynda ótip jatqan boks keshiniń anderkardynda boldy. 

Jekpe-jek on raýndqa josparlanǵan edi. Qarsylastar belsendi qımyl kórsetýge tyrysty.

Qazaqstandyq boksshy qarsylasyna kóbirek soqqy jumsaýǵa kúsh saldy. Degenmen tóreshiler sheshimimen jeńis AQSh boksshysyna berildi. Buǵan deıin Ivan Dychko barlyq qarsylasyn tize búktirgen edi.

Sońǵy ret Ivan Dychko shilde aıynda kezekti jekpe-jeginde amerıkalyq boksshy Semıýel Krossdty (11-5-1, 7 KO) nokaýtqa jiberdi.

Al Djermeın Franklın 2024 jyldyń mamyr aıynan beri sharshy alańǵa shyqqan joq. Ol joly altynshy raýndta otandasy Devın Vargasty (23-11, 10 KO) merziminen buryn jeńgen edi.

Ivan Dychko 1990 jyly 11 tamyzda dúnıege kelgen. Áýesqoı boksta 2012, 2016 jyldary Olımpıadanyń qola júldegeri bolsa, álem chempıonatynda 2013, 2015 jyldary kúmis, 2011 jyly qola aldy.

Al 2013, 2015 jyldary Azııa chempıony atandy.