ІV respýblıkalyq azanshylar jarysynyń jeńimpazdary anyqtaldy
Osymen tórtinshi ret ótken jarysta qazylar alqasynyń sheshimimen bas júldeni Nur-Sultan qalasyndaǵy respýblıkalyq «Áziret Sultan» meshitiniń azanshysy Erlan Bıtenov jeńip alsa, ekinshi oryn Mańǵystaý oblysy, Jańaózen qalasynyń naıb ımamy Ábdilmútálip Joraqululyna buıyrdy. Al úshinshi oryndy Almaty qalasyndaǵy «Nur Múbarak» meshitiniń azanshysy Aqnazar Maratuly qanjyǵasyna baılady. Jambyl oblysynan kelgen Jalǵasbaı Jubatqanov, qaraǵandylyq Saǵyndyq Ahmedııanov pen qyzylordalyq Bekzat Júsipuly yntalandyrý syılyǵyna ıe bolsa, jeńimpazdardy QMDB tóraǵasy, Bas múftı Naýryzbaı qajy Taǵanuly marapattap, aq tilegin aıtty.
– Qazaqta «Qudaıǵa jaǵam deseń, azandy bol, halyqqa jaǵam deseń, qazandy bol» degen sóz bar. Azan – sharıǵatta úkimi bekitilgen súnnet. Azannyń durys bolýy, maqamnyń ádemiligi óte mańyzdy. Azanshylar jarysynyń maqsaty da olardyń kásibıligin arttyrý, ádemi aıtý ǵana emes, azannyń sharttaryn da bilý kerek. Álemdi jaılaǵan pandemııa kezinde meshit esikteri jabylǵanymen, azan aıtý toqtaǵan joq. Meshitterde bes mezgil azan úni sharyqtap turdy. Azan aıtylǵan jerdi Alla Taǵala túrli jamandyqtan saqtaıdy. Laıym, ádemi áýezdi azanshylar kóp bolyp, halqymyzdyń ımandylyǵy artyp, jerimizde tynyshtyq bolǵaı, - dedi Bas múftı.
Sondaı-aq QMDB tóraǵasy Naýryzbaı qajy Taǵanuly azanshylar jarysyn jyl saıyn dástúrli túrde ótkizý josparda bar ekenin aıtty. Jarys sońynda jeńimpazdar men júldegerler aqshalaı syılyqpen, sondaı-aq, jarysqa qatysýshylar men demeýshiler arnaıy alǵys hatpen marapattaldy.
