ITB Berlin kórmesine kelýshiler qymyzdan kokteıl iship, qurt jasaýdy úırenedi
Bıyl álemniń eń iri týrıstik sharalarynyń birine 181 elden 10 myńnan asa adam, týrıstik bıznestiń 100 myńnan asa kásibı mamany qatysady dep kútilýde. Keshe QR Mádenıet jáne sport mınıstri Arystanbek Muhamedıulynyń jáne Qazaqstannyń Germanııa Federatıvtik Respýblıkasyndaǵy Tótenshe jáne ókiletti elshisi Bolat Núsipovtiń qatysýymen kórmedegi qazaqstandyq stendtiń ashylý saltanaty ótti.
Resmı ashylýdan keıin stendte «Kazakh Tourism» UK» AQ jáne Messe Berlin arasynda berlındik kórmeniń analogy ITB Eurasia kórmesin kelesi jyly Astanada ótkizý jónindegi kelisimge qol qoıyldy. QR Mádenıet jáne sport mınıstrliginiń týrızm ındýstrııasy komıteti jáne Almaty qalasy týrızm basqarmasy uıymdastyrǵan qazaqstandyq stendtiń negizgi kontseptsııasy - elimizdiń mádenıeti jáne etnıka boldy.
Bıyl Berlın qalasyndaǵy kórmede «Kazakh Tourism» UK» AQ ulttyq taǵamdarǵa, kóshpeli órkenıet murasyna, Qazaqstannyń mádenı jáne tabıǵı oryndaryna erekshe mán berip, etnıkalyq jáne mádenı týrızm taqyrybyn usyndy. Stendte ótetin sheberlik synyptarynda qonaqtarymyz qurt jáne jent jasaýdy, sazsyrnaı mýzykalyq aspabyn jasaýdy úırene alady. Sondaı-aq kórmede biregeı «barmen-shoý» ótpek: qonaqtarǵa qymyzdan jasalǵan túrli kokteılderden dám tatýǵa múmkindik beriledi.
Osylaısha, 5 kún ishinde qazaqstandyq stendti tamashalaýshylar elimizdiń mádenıetimen jáne salt-dástúrimen tanysady. Buǵan qosa, kórmege kelýshiler Bozjyra shatqaly beınelengen fotozonanyń aldynda sýretke túsip, vırtýaldy shyndyq kózildirigin taǵyp kórip, dástúrli dastarhan túrinde jasalǵan arnaıy b2b aýmaǵynda qazaqstandyq týrıstik kompanııalarmen kelissóz júrgize alady.
Kórmedegi qazaqstandyq delegatsııa quramyna 30-dan asa adam kiredi, onyń ishinde elge týrıst ákelýshi týrıstik kompanııalardyń, qonaq úıler men óńirlik týrızm basqarmalarynyń ókilderi bar.
Aıta keteıik, ótken jyly Germanııadan Qazaqstanǵa 100 myńǵa jýyq týrıst kelgen.
