Italııada Abaı Qunanbaıulynyń bıýsti ashyldy
ASTANA. KAZINFORM - Rımdegi Vılla Gratsıolı saıabaǵynda (Parco di Villa Grazioli) qazaq halqynyń uly aqyny ári oıshyly Abaı Qunanbaıuly bıýstiniń saltanatty ashylýy ótti.
Іs-sharaǵa QR Mádenıet jáne aqparat mınıstri Aıda Balaeva, Qazaqstan Respýblıkasynyń Italııa Respýblıkasyndaǵy Tótenshe jáne Ókiletti Elshisi Erbolat Sembaev, ıtalııalyq zııaly qaýym ókilderi men Qazaqstannyń resmı delegatsııasy músheleri qatysty.
Mınıstr saltanatty is-sharada sóılegen sózinde Abaı Qunanbaıuly qazaq halqynyń rýhanı kemeldenýine baǵdar bolǵan, adamzattyń asyl murattaryn nasıhattaǵan uly tulǵa ekenin atap ótti. Onyń shyǵarmalaryndaǵy basty ıdeıa – adamgershilik, ádildik, bilim men eńbek arqyly izgilikke úndeý. Sondyqtan da Abaı beınesiniń dál Rım qalasynda boı kóterýi – mádenıetter men órkenıetter arasyndaǵy rýhanı kópirdiń belgisi bolary anyq.
– Keıingi jyldary memleketterimiz arasyndaǵy qarym-qatynas erekshe serpin aldy. Ótken jyly Qazaqstan Prezıdentiniń Italııaǵa resmı sapary men Italııa Mınıstrler keńesiniń tóraıymy Qazaqstanǵa jasaǵan resmı sapary yntymaqtastyqty jańa deńgeıge kóterdi. Al qyrkúıek aıynda Italııa Prezıdenti Qazaqstanǵa kelip, jańa baılanystarǵa jol ashyp, birqatar mańyzdy kelissóz jasaldy. Búgingi Abaı eskertkishiniń ashylýy – sol kelisimderdiń kórinisi, eki halyq arasyndaǵy dostyq pen ózara qurmettiń belgisi dep bilemin, – dedi Aıda Balaeva.
Aıta ketsek, qazaqtyń uly aqyny Abaıdyń esimi shetelde zor qurmetke ıe. Aqynǵa arnalǵan eskertkishter, bıýster men monýmentter álemniń kóptegen iri qalalary men astanalarynda ornatylǵan. Mádenıet jáne aqparat mınıstrligi málimetinshe, olardyń qatarynda, Tashkent, Máskeý, Qazan, Bishkek, Beıjiń, Kaır, Býdapesht, Tegeran, Ankara, Ystambul, Nıý-Delı, Jeneva, Parıj, Renn, Saraevo, Tbılısı, Berlın, Seýl, Harkov, Baký jáne Rıo-de-Janeıro qalalary bar.
Aıda Balaeva men Erbolat Sembaev Shyńǵys Aıtmatov eskertkishine gúl shoqtaryn qoıdy.
Bıyl Rım qalasynda qazaqtyń bas aqyny Abaı Qunanbaıulynyń músini ornatylatynyn jazǵan bolatynbyz.
Bul týraly Aqordada Italııa Prezıdenti Serdjo Mattarellamen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.