Italııa men Qazaqstan ǵalymdary qaı salalarda ortaq joba jasaıdy
ASTANA. KAZINFORM – Nazarbayev University jáne Italııanyń Qazaqstandaǵy elshiligi birlesip «Ǵylym men shyǵarmashylyq» konferentsııasyn ótkizdi jáne Qazaqstanda júzege asyrylyp jatqan, Italııanyń ýnıversıtetteri men ǵylymı-zertteý ınstıtýttarymen birlesken ózekti ǵylymı jobalardy talqylady.
Onyń ashylýynda QR Ǵylym jáne joǵary bilim mınıstri Saıasat Nurbek elimizdiń ǵylym men zertteý salasynda jańa kezeńge qadam basyp jatqanyn atap ótti.
− Joǵary bilim berý júıesindegi ǵylymdy damytýdyń ulttyq tujyrymdamasy arqyly biz ǵylymdy qoǵam men ekonomıkanyń naqty qajettilikterimen tikeleı baılanystyratyn ashyq modelge kóshemiz. Qazirgi ǵylym tek zertteý júrgizip qana qoımaı, naqty mindetterdi sheship, ınnovatsııalardy engizip, shabyttandyrýy qajet. Osyndaı konferentsııalar bizge ǵylymnyń tek derekter men jańalyqtar ǵana emes, ınnovatsııalar, mádenıet, baılanys pen seriktestik ekenin de eske salady. Leonardo da Vınchı men Enrıko Fermıden bastaý alǵan Italııanyń ǵylymdaǵy uzaq dástúri búkil álemge shabyt berýin jalǵastyryp jatyr. Qazaqstanda biz ǵylymı qaýymdastyqtarymyz arasynda kópir ornatyp, ortaq mindetterdi birlesip sheshýge umtylamyz, − dedi mınıstr.
NU Medıtsına mektebiniń ınstrýktory Eltaı Rahmanovtyń aıtýynsha, Italııa men Qazaqstan arasynda qazir densaýlyq saqtaý salasynda daralanǵan medıtsına, kardıologııa, sport medıtsınasy, robototehnıka, ınjenerııa, taý-ken óndirisi salasynda birlesken jobalar bar.
− Biz tek qana Nazarbaev ýnıversıteti emes, aımaqtaǵy ýnıversıtetterdiń de Italııa uıymdarymen seriktestik ornatýyna kómektesemiz. Máselen, olardyń arasynda Aqtóbedegi Marat Ospanov medıtsınalyq ýnıversıteti jáne Semeı medıtsınalyq ýnıversıteti bar jáne basqa da oqý oryndarynda ǵylymı jobalar boıynsha seriktestikter bar. Eń ınnovatsııalyq jobamyzdyń biri – sport kardıologııasynda az ınvazıvti ádisterdi qoldanyp, kardıologııadaǵy dıagnostıkany jetildirýge arnalǵan bastama boldy. Ekinshi joba – ońaltý baǵytynda, Italııanyń úlken ınnovatsııalyq kompanııalary telereabılıtatsııalyq qurylǵylary Qazaqstannyń shalǵaı eldimekenderine jetkizildi. Bul ǵylymı ortany damytýǵa úlken úles qosady. Osyndaı platforma eki el arasyndaǵy ınnovatsııa men ǵylymnyń damýyna áser etedi dep oılaımyn. Ári qaraı Qazaqstan aýmaǵynda emes, tutas Ortalyq Azııadaǵy ózekti jobalardy birge jasaýǵa úmittenemiz. Eýropa odaǵyndaǵy saıasat pen ıntegratsııa birdeı bolǵandyqtan, bul tájirıbeni basqa da eýropalyq eldermen jáne ýnıversıtettermen jalǵastyrýǵa bolady, − dedi E.Rahmanov.
Óz kezeginde Italııanyń Qazaqstandaǵy Elshisi Antonello De Rıo Qazaqstan óziniń biregeıligin túsinetin jáne ótken men bolashaqty biriktirýde strategııalyq seriktes bolyp otyrǵan qarqyndy el ekenin atap ótti. Onyń aıtýynsha, kóptegen ıtalııalyq ǵalymdar jumys isteıtin NU-men yntymaqtastyq — ǵylymnyń mádenı dıplomatııa men ekonomıkalyq ósýdiń qozǵaýshy kúshine aınalǵanynyń dáleli.
− Búgingi kúnniń negizinde tereń senim jatyr: gýmanıtarlyq jáne ǵylymı bilim arasyndaǵy úılesim −tek ıdeal ǵana emes, mádenı murany jańasha uǵynýdyń naqty qajettiligi der edim. Gýmanıtarlyq negizsiz ǵylymnyń baılanys ornatýdaǵy tıimdiligi tómendeıdi. Dál osy pánaralyq dıalog mádenıetti ınnovatsııanyń, damýdyń jáne jahandyq ózara árekettestiktiń tutqasyna aınaldyrady, — dedi elshi De Rıý.
Konferentsııada NU mektepterinde qyzmet etetin ıtalııalyq professorlar, atap aıtqanda, Joǵary memlekettik saıasat mektebi, Injenerııa jáne tsıfrlyq ǵylymdar mektebi, Jaratylystaný, gýmanıtarlyq jáne áleýmettik ǵylymdar mektebi, Medıtsına mektebi ǵalymdary óz eńbekterin tanystyrdy.
− Ǵylym men kreatıvti ındýstrııaǵa arnalǵan bul keremet konferentsııa pánaralyq yntymaqtastyqtyń mańyzy ósip kele jatqanyn kórsetedi. Italııa uzaq ýaqyt boıy kreatıvti ındýstrııalar salasynda kóshbasshy sanalady jáne biz úshin Italııa qoǵamdastyǵymen de, Italııanyń Qazaqstandaǵy elshiligimen de berik jáne jemisti qarym-qatynasta bolý — úlken mártebe. NU osyndaı perspektıvaly bastamaǵa alań bolyp otyrǵanyn maqtan tutady, sondaı-aq akademııalyq almasý men jetekshi ıtalııalyq ýnıversıtettermen, bilim berý mekemelerimen birlesken jobalardyń kóbeıýin asyǵa kútedi, − dep qorytyndylady NU prezıdenti professor Vakar Ahmad.
Aıta keteıik, álemdik 86 ýnıversıtettiń grantyn jeńip alǵan arystyq Aısultan Italııada bilim alǵysy keledi.
