Ystyqtan qalaı qorǵanýǵa bolady – dáriger keńesi
ALMATY. KAZINFORM – Bastan kún ótý – bul kóbine jaz mezgilinde bolady. Ol kún sáýlesiniń bas aımaǵyna tikeleı áser etý sebebinen týyndaıdy. Bul týraly týraly Almatydaǵy №18 qalalyq emhananyń jalpy tájirıbelik dárigeri Ýlmıra Rahmatýlla aıtty.
Dárigerdiń sózinshe, kún ótken kezde tynys alý qıyndap, dene qyzýy kóterilip jáne bas qatty aýyrady.Sondaı-aq keıbir jaǵdaıda adamdar esten tanyp qalýy múmkin.
«Bul kúı aptap ystyq kezinde saǵat 11-16 aralyǵynda kún astynda uzaq bolýdan týyndaıdy. Sondyqtan jaǵajaıda, baý-baqshada nemese jattyǵý kezinde de kún ótýi múmkin. Kúnniń tikeleı sáýleleri saldarynan bas ysyp, bas mıynyń bólikteri qyzyp ketedi. Munyń barlyǵy arterıalyq qysymnyń kóterilýine sebep bolady. Al bul jaǵdaı usaq tamyrlardyń úzilýine, ortalyq júıke júıesi men adam aǵzasy úshin mańyzdy fýnktsııalardyń buzylýyna sebep bolady», - dedi dáriger.
Bul jaǵdaıda durys alǵashqy kómek kórsetý mańyzdy.
«Ásirese, júkti áıelder men balalarǵa qatty áser etedi. Kishkentaı balalar eresekter sııaqty dene temperatýrasyn tıimdi retteı almaýy múmkin. Ondaı jaǵdaıda, dymqyl matany denesine jaýyp, mańdaıy men jelkesine dymqyl oramal qoıǵan abzal. Salqyn sý (sýyq emes) berý qajet», - dep atap ótti dáriger.
Kúnnen qorǵaný úshin birneshe keńes:
– Denege túsetin fızıkalyq kúshti shekteý;
– Salqyndatý úshin kondıtsıonerdi nemese jeldetkishti paıdalaný;
– Ústińizge ashyq tústi kıim kııý;
– Kóleńke jerlermen júrý;
– Sýdy kóp ishý. Alkogol men kofeden aýlaq bolǵan durys, óıtkeni olar sýsyzdanýdy arttyrady;
– Ózińizdi nashar sezinseńiz, dereý medıtsınalyq kómekke júgingen abzal.
Almaty densaýlyq saqtaý basqarmasynyń málimetinshe, maýsym aıynyń basynan beri aptap ystyq pen kún ótýge 16 adam medıtsınalyq kómekke júgingen, onyń 5-i bala.
