Ystyqkólde Qazaqstan azamaty qaıyq soǵyp qaza boldy

ASTANA. KAZINFORM — Qyrǵyzstanda Ystyqkólde qaıyqtyń soqtyǵysýy saldarynan qazaqstandyq qaza tapty.

Ystyqkól oblysy ІІD málimetinshe, oqıǵa 15 shilde kúni keshke bolǵan. Balyqshy qalasynyń týmasy, qazirgi Qazaqstan azamaty K.B. (1982 jyly týǵan) Qara-oı aýylyndaǵy demalys ortalyqtarynyń biriniń jaǵajaıynda qaıyq soǵylǵannan keıin aýdandyq aýrýhanaǵa jetkizildi. Kelesi kúni er adam reanımatsııada qaıtys boldy.

Tergeýge deıingi is-sharalar barysynda sý qaıyǵy ıesiniń (Ystyqkól aýdanynyń týmasy, 1992 jyly týǵan) jáne júrgizýshiniń (Qara-oı aýylynyń týmasy, 2006 jyly týǵan) jeke basy anyqtaldy.

Osy fakti boıynsha Ystyqkól oblysynyń ishki ister departamenti Qyrǵyzstan Respýblıkasy Qylmystyq kodeksiniń 127-babynda kózdelgen «Abaısyzda adam ólimine ákep soǵý» jáne 311 baby «Jol qozǵalysy, temir jol, áýe nemese sý kóligindegi qozǵalys qaýipsizdigi qaǵıdalaryn buzý» baptary boıynsha qylmystyq is qozǵady.

Qazir tergeý amaldary júrgizilýde.