Іsti bolǵan QR SІM-niń burynǵy sheneýnikteri aqtalyp shyqty
Nur-Sultan qalasy sotynyń qylmystyq ister jónindegi sot alqasy QR Syrtqy ister mınıstrliginiń burynǵy jaýapty hatshysy Anarbek Qarashev, Qazaqstannyń Ózbekstandaǵy burynǵy elshisi Erik Ótembaev jáne «Dıplomatııalyq qalashyq qurylysy dırektsııasy» JShS dırektory B. Nurekenovke qatysty qylmystyq isti qarady.
«Eske sala keteıik, budan buryn Nur-Sultan qalasy «Baıqońyr» aýdanynyń №2 sotynyń 2020 jylǵy 18 qyrkúıektegi úkimimen A.Qarashev (QR SІM-niń burynǵy jaýapty hatshysy) laýazymdyq ókilettigin asyra paıdalanǵany, al E.Ótembaev (QR Ózbekstandaǵy burynǵy elshisi) jáne B.Nurekenov (merdigerlik uıymnyń dırektory) - atalǵan is-áreketterge járdemdeskeni úshin kináli dep tanylǵan bolatyn», - delingen habarlamada.
Apellıatsııalyq alqa atalǵan iske qatysty «Qyzmettik ókilettikti teris paıdalaný» aıyby boıynsha zalal joq degen qorytyndyǵa keldi.
«A.Qarashevtiń laýazymdyq ókilettikterin teris paıdalanýy jáne oǵan E.Ótembaev pen B.Nurekenovtyń járdemdesý is-áreketi men sebep-saldary dáleldenbegen. Al dálel qylmys quramynyń mindetti bóligi», - dep habarlaıdy qalalyq sottan.
Laýazymdyq ókilettigin teris paıdalaný boıynsha tulǵany kináli dep taný úshin kelesi jaǵdaılardy anyqtaý qajet:
- jeke basyna, basqa adamdarǵa nemese uıymdarǵa qatysty qyzmettik ókilettigin paıdalaný maqsatynyń bolýy;
- qyzmettik ókilettigin paıdalaný kezinde basqa adamdarǵa nemese uıymdarǵa zııan keltirý.
«Sot tergeýi barysynda apellıatsııalyq satyda A.Qarashevtiń qyzmet babyn teris paıdalanǵany jáne E.Ótembaev pen B.Nurekenov tarapynan járdem berilgeni rastalmady. Іsti qaraý nátıjesi boıynsha qylmystyq ister jónindegi sot alqasymen aqtaý úkimi shyǵaryldy», - dep jazylǵan sottyń aqparatynda.
Eske sala ketsek, 2020 jyly 2 qazanda QR Syrtqy ister mınıstrliginiń burynǵy jaýapty hatshysy Anarbek Qarashev pen Qazaqstannyń Ózbekstandaǵy burynǵy elshisi Erik Ótembaevqa qatysty Nur-Sultan qalasy «Baıqońyr» aýdany № 2 soty aıyptaý úkimin shyǵarǵan edi.
