Ystanbuldaǵy Izraıl konsýldyǵy mańyndaǵy atys isi boıynsha 11 adam ustaldy

ASTANA. KAZINFORM -Ystanbulda Izraıl konsýldyǵy ǵımaraty janynda polıtsııa qyzmetkerlerine jasalǵan shabýyldy tergeý jalǵasyp jatyr, dep habarlaıdy «Qazınform» agenttiginiń Ankaradaǵy menshikti tilshisi.

Quqyq qorǵaý organdary polıtsııa beketine jasalǵan terrorıstik shabýyl isi boıynsha kúdiktiler qataryn keńeıtti. Bul týraly Hürriyet habarlady. Sońǵy málimetterge sáıkes, ustalǵandar sany 11 adamǵa jetti.

Oqıǵadan keıin birden polıtsııa shabýyl bolǵan jaqyn derden úsh adamdy ustaǵan. Tergeý barysynda jáne ustalǵandardyń jaýaptaryna súıene otyryp, taǵy bes kúdikti anyqtalyp, qamaýǵa alyndy. Sonymen qatar, eki adam Izmıt pen Konıa qalalarynda júrgizilgen operatsııalar kezinde ustaldy.

Tergeý derekterine qaraǵanda, shabýyl jasaǵandar qylmys aldynda nysandy aldyn ala baqylap, barlaý júrgizgen.

Іs aıasynda kúdiktilerdiń biriniń jubaıy da jaýap bergen.

Onyń aıtýynsha, ol kúıeýin qarýly shabýyl jasaýdan bas tartýǵa kóndirýge tyrysqan.

Buǵan deıin Ystanbuldyń iskerlik aýdanynda Izraıl bas konsýldyǵy mańynda polıtsııa men úsh qarýly adam arasynda atys bolǵany habarlanǵan edi.