Ispanııada taǵy da separatısterge raqymshylyq jasaýǵa qarsy sherý ótti

Madrıdtegi narazylyq sherýleriniń aldynda Jenevada premer-mınıstrdiń mindetin atqarýshy Pedro Sanches partııasynyń ókilderi Katalonııanyń táýelsizdigin jaqtaýshylarmen kezdesý ótkizdi. Kazinform bul týraly DW jańalyqtaryna silteme jasap habarlaıdy.

3 jeltoqsan kúni myńdaǵan adam Ispanııa premer-mınıstriniń mindetin atqarýshy Pedro Sanchestiń táýelsizdikke umtylǵan katalondyqtarǵa keshirim jasaý josparyna narazylyq bildirý úshin taǵy da kóshelerge shyqty.

Bıliktiń málimetinshe, sherýge 8 myń adam qatysqan. Uıymdastyrýshylar sany 15 000 boldy.

- Bul bassyzdyqty dereý toqtatý kerek,- dedi oppozıtsııalyq konservatıvti Halyq partııasynyń jetekshisi Alberto Nýnes Feıhoo.

Sonymen qatar, konservatıvti saıasatker Sanchestiń partııasyn Pýchdemonnyń sheteldegi jaqtastarymen baılanysyn úzýge shaqyrdy.

Sherýshiler mıtıngke «Sanches túrmege qamalsyn!» jáne «Sanches Otanyn satqysh» degen urandar jazylǵan plakattarmen shyqty.

Bir kún buryn, 2 jeltoqsanda Katalonııa táýelsizdigi úshin kúresip júrgen Karles Pýchdemon partııasynyń músheleri Jenevada Sanches bastaǵan Ispanııa Sotsıalıstik jumysshy partııasynyń ókilderimen keńesý úshin kezdesken.