Ispanııa sheteldikterdi jappaı zańdastyrdy: bul múmkindik pe, qaýip pe

ASTANA. KAZINFORM – Ispanııa mınıstrler keńesi 27 qańtarda el aýmaǵynda zańsyz júrgen shetel azamattaryna 2026 jylǵy sáýir-maýsym aılary aralyǵynda jumys isteý quqyǵymen ýaqytsha turýǵa ruqsat alýǵa múmkindik beretin «tótenshe zań-dekretti» maquldady, dep habarlaıdy DW.

Bıliktiń málimetinshe, bul shara shamamen jarty mıllıon adamdy qamtıdy. Al táýelsiz derekkózder Ispanııada zańsyz júrgen mıgranttar sany 1 mıllıonǵa jýyq ekenin aıtady.

Oppozıtsııa jappaı zańdastyrý eldegi onsyz da kúrdeli áleýmettik máselelerdi ýshyqtyrýy múmkin dep eskertedi.

– Ispanııadaǵy zańsyz mıgranttardyń basym bóligin Latyn Amerıkasy men Afrıka elderinen kelgender quraıdy. Jańa zań eń aldymen osy toptarǵa qatysty, – dep túsindirdi mıgratsııa jónindegi advokat Anhela Garsııa.

Onyń aıtýynsha, bul sharamen negizinen «ekonomıkalyq mıgranttar» qamtylǵan, alaıda dekretti Ispanııadan pana izdep júrgender de paıdalana alady.

Qazirgi tańda saıası baspana berý rásimi óte baıaý júrip jatyr, ótinish kútip otyrǵandardyń arasynda júzdegen Reseı azamaty bar. Endi bılik barlyq ótinishti úsh aıdyń ishinde qaraýǵa, al jumys isteý quqyǵyn qujat tapsyrǵannan keıin eń kóbi 15 kún ishinde berýge ýáde etip otyr.

– Bul bastama tótenshe dekret retinde qabyldanǵandyqtan, parlamenttiń maquldaýyn qajet etpeıdi. Al parlamentte bul qujatqa qarsy shyǵatyndar az emes, – deıdi saıasattanýshy Hose Marııa Fernandes.

Ol jańa zań kópshilik úshin «tosyn sheshim» bolǵanyn jetkizdi. Qarsy tarap ókilderi bul qadam tegin medıtsınalyq qyzmet kórsetý júıesiniń shamadan tys júktelýine, áleýmettik qorlarǵa sheteldikterdiń jappaı qol jetkizýine, turǵyn úı daǵdarysynyń ýshyǵýyna jáne mıgranttyq gettolardyń qalyptasýyna ákelýi múmkin dep qaýiptenedi.

Lıberaldy-konservatıvti oppozıtsııa sheteldikterdi jappaı zańdastyrý týraly dekretti «zańsyz» dep atap, onyń Eýroodaqtyń baspana berý týraly paktisin buzatynyn málimdedi. Al ýltraońshyl Vox partııasy bul zańdy Joǵarǵy sotta daýlaýǵa ýáde berdi.

Aıta keteıik, buǵan deıin Ispanııada mıgranttardy zańdastyrýdyń jańa baǵdarlamasy iske qosylatyny habarlandy.