Ispanııa mınıstrliginiń ókili Qazaqstannyń ólim jazasyn alyp tastaýyna joǵary baǵa berdi

NUR-SULTAN. QazAqparat – Ispanııa Koroldigi Syrtqy ister, Eýropalyq odaq jáne yntymaqtastyq mınıstrliginiń memlekettik hatshysy Krıstına Gaıak Qazaqstannyń Ólim jazasynyń kúshin joıýǵa baǵyttalǵan Azamattyq jáne saıası quqyqtar týraly halyqaralyq paktige qosylýyn joǵary baǵalady, dep habarlaıdy QazAqparat tilshisi.

«Bul sheshimniń mańyzdylyǵyn erekshe atap ótkim keledi. Ispanııa ólim jazasyna qarsy halyqaralyq komıssııany qoldaıtyn el retinde Qazaqstannyń osynaý batyl qadamyn qoldaıdy. Men ólim jazasyn joıýdy qoldaıtyn halyqaralyq toptardyń talqylaýlaryna, jumystaryna qatystym jáne Qazaqstannyń bul qyzmettegi mańyzdy róline kýáger de bolǵan edim. Sonymen qatar atalǵan hattamany ratıfıkatsııalaý jolynda mańyzdy ári batyl qadam jasaǵan Qazaqstan Prezıdenti Qasym-Jomart Toqaevqarızashylyǵymdy bildirip, kóshbasshylyǵyn joǵary baǵalaǵym keledi», - dedi Krıstına Gaıak.

Esterińizge sala ketsek, búgin elordada Qazaqstan Syrtqy ister mınıstrligi men Ispanııa Koroldigi Syrtqy ister, Eýropalyq odaq jáne yntymaqtastyq mınıstrligi arasynda saıası konsýltatsııalardyń 6-raýndy ótken edi.

Aıta keteıik, osy jyldyń basynda Memleket basshysy Qasym-Jomart Toqaev «Ólim jazasynyń kúshin joıýǵa baǵyttalǵan Azamattyq jáne saıası quqyqtar týraly halyqaralyq paktige Ekinshi Fakýltatıvtik Hattamany ratıfıkatsııalaý týraly» Qazaqstan Respýblıkasynyń Zańyna qol qoıǵan bolatyn.