Ispanııa meteoqyzmeti jańa órt qaýpi týraly eskertti

ASTANA. KAZINFORM — Bul senbide Ispanııada qaıtadan órt bastaldy: ekinshi deńgeıli 13 oshaq Kastılııa-Leon, Galısııa jáne Astýrııa aımaqtarynda tirkeldi, dep habarlaıdy Kazinform menshikti tilshisi. 

Sonymen qatar Ispanııanyń memlekettik meteorologııalyq agenttigi (Aemet) túbektiń soltústik-batysy men ońtústiginde «óte joǵary nemese ekstremaldy» órt qaýpi bar ekenin eskertip, asa saq bolýǵa shaqyrdy.

Eýropanyń orman órtteri týraly aqparat júıesiniń derekterine súıensek, elde eki aptadan beri jalǵasyp jatqan órt 407 myń gektardan astam aýmaqty joıyp jibergen.

Tek Galısııanyń ózinde, Ispanııanyń orman sharýashylyǵy agenttigi (Aemet) soltústikte azdaǵan jańbyr kútiletinin boljaǵanyna qaramastan, shamamen 90 myń gektar jer otqa orandy.

Osy ýaqytta Ispanııa bıligi oryn alǵan órtterge jeke tulǵalardyń qatysy bolýy múmkin ekenin joqqa shyǵarmaıdy. Memlekettik úılestirý komıtetiniń (CECOD) orman órtteriniń shyǵý sebepteri týraly sońǵy esebine sáıkes, 1 maýsymnan 22 tamyzǵa deıingi kezeńde bastalǵan órtterge baılanysty barlyǵy 42 adam qamaýǵa alynyp, 132 adamǵa qatysty tergeý júrgizilýde. Qamaýǵa alynǵandardyń 11-in Ulttyq polıtsııa, 31-in Azamattyq gvardııa ustaǵan. Al tergeý Ulttyq polıtsııa tarapynan 23 adamǵa, Azamattyq gvardııa tarapynan 109 adamǵa qatysty júrgizilip jatyr.

Bul kórsetkishter: klımattyń ózgerýine jergilikti bılik jıi nazar aýdarǵanymen, apattyń negizgi kózderiniń biri áli de adam faktory bolyp otyrǵanyn kórsetedi. 

Aıta ketelik Ispanııadaǵy orman órti aýyl sharýashylyǵyna 600 mln eýro shyǵyn keltirdi.