Islandııada janartaý atqylap, bir shaqyrymdyq jaryq paıda boldy

ASTANA. KAZINFORM — Islandııa astanasy Reıkıavık qalasyna jaqyn mańda Sýndhnýkýr janartaýy atqylady, dep habarlaıdy AZERTADJ.

Bul Soltústik Atlantıkadaǵy aral elinde 2021 jyldan beri tirkelgen 12-shi janartaý atqylaýy bolyp otyr, dep habarlaıdy Islandııanyń Meteorologııalyq basqarmasy.

Agenttik sheteldik BAQ-qa silteme jasap habarlaǵandaı, basqarma taratqan málimetke sáıkes, Islandııanyń ońtústik-batysynda paıda bolǵan jaryqtyń uzyndyǵy 700-den 1000 metrge deıin jetedi.

— Lava negizinen ońtústik-shyǵys baǵytta aǵyp jatyr jáne ınfraqurylym nysandaryna qaýip tóndirip turǵan joq. GPS ólshemderi men jer qyrtysynyń deformatsııa belgilerine qaraǵanda, bul salystyrmaly túrde shaǵyn kólemdegi atqylaý bolýy múmkin, — delingen basqarma habarlamasynda.

Tikeleı efırde aspanǵa atylǵan lava men tútin aǵyndary anyq kórindi.

Qazir Kók Lagýna dep atalatyn áıgili geotermaldyq kýrorttan jáne jaqyn mańdaǵy Grındavık atty balyqshylar qalashyǵynan adamdar qaýipsiz jerge evakýatsııalandy. Sársenbi kúni bolǵan bul atqylaý — ortalyq kraterden emes, jer qyrtysyndaǵy uzyn jaryqtar arqyly lava aǵýmen sıpattalatyn jaryqtyq janartaý atqylaýynyń bir túri.

Buǵan deıin Islandııanyń ońtústik-batys bóligindegi Reıkıanes túbeginde ornalasqan Sýndhnýkýr janartaýy sáýir aıynda atqylaǵany habarlanǵan edi.