Islandııada janartaý atqylaǵandyqtan turǵyndardy evakýatsııalaý bastaldy

ASTANA. KAZINFORM — Reıkıanes túbeginde janartaýdyń qaıta atqylaýyna baılanysty Islandııanyń ońtústiginde tótenshe jaǵdaı jarııalandy — bul jeltoqsannan bergi tórtinshi jáne búgingi kúnge deıingi eń qýatty atqylaý, dep habarlaıdy BBC.

Evakýatsııalaýdy suraǵandardyń arasynda buryn seısmıkalyq belsendilikten qatty zardap shekken shaǵyn Grındavık qalasynyń turǵyndary da bar.

Sondaı-aq Islandııanyń basty kórikti jerleriniń biri — Kók lagýnadan adamdardy evakýatsııalaý júrgizildi. Janartaý atqylaý kezinde aımaqta 500-den 600-ge deıin adam bolǵan.

Balqyǵan lavadan kóterilgen tútinge qaramastan eldiń áýe keńistigi ashyq kúıinde qaldy.

Eldiń azamattyq qorǵanys qyzmetiniń málimetinshe, atqylaý senbi kúni keshke Grındavıktiń soltústigindegi Hagafell men Stora-Skogfell taýlarynyń arasynda bastalǵan.

Buǵan deıin janartaý osy aýdanda 8 aqpanda atqylaǵan.

Janartaý atqylaý ornynan túsirilgen sýretterde jerdegi tesikterden aǵyp jatqan tútin men lava kórinip tur. Zardap shekken aımaqtardy tikushaqpen ushyp ótkenderdiń qatarynda bolǵan geofızık Magnýs Týmı Gýdmýndsson jergilikti BAQ-qa senbi kúngi atqylaýdy ázirge eń kúshti dep sanaýǵa bolatynyn aıtty.