Islandııada iri janartaý atqylaı bastady

Islandııanyń ońtústik-batysynda janartaý oıandy. Bılik bul týraly senbi kúni keshke Grındavık qalasy men oǵan jaqyn ornalasqan aýyldardyń turǵyndaryna habarlaǵan. Meteorologııalyq qyzmetterdiń sońǵy málimeti boıynsha, lava qalanyń soltústik shekarasyna 450 metrge deıin jaqyndaǵan. Kazinform bul týraly Euronews arnasyna silteme jasap habarlaıdy.

Buryn Grındavıktiń aınalasyna lava aǵynyn bógeýge arnalǵan qorǵanys bógetteri salynǵan. Biraq jergilikti bılik ókilderiniń aıtýynsha, olardyń keıbiri jerasty dúmpýi saldarynan opyrylyp qulaǵan. Qala turǵyndary dúısenbi kúni keshke evakýatsııalandy, olar úsh aptaǵa deıin oralmaýy kerek. Tek tıisti qyzmetkerlerge ǵana ruqsat etiledi.

Islandııanyń Ádilet mınıstri Gýdrýn Hafsteınsdottır qala osy jazda nemese kúzde qaýipsiz ári ómir súrýge qolaıly bolady dep úmittenetinin aıtty.

Qarasha aıynda el astanasy Reıkıavıkten birneshe shaqyrym jerde ornalasqan Reıkıanes túbeginde janartaý atqylaýy birqatar jer silkinisterin týdyrǵannan keıin Grındavık turǵyndary evakýatsııalandy. Kóp uzamaı turǵyndarǵa qaıtyp oralýǵa ruqsat etilgenimen, ǵımarattardyń kópshiligi zaqymdanǵan jáne kósheler búlingen.

Sársenbi kúni opyrylyp qalǵan jer oıyǵyn toltyrý jumystaryn júrgizip jatqan qurylysshy oǵan qulap ketken. Dereý qutqarý operatsııasy bastaldy, biraq joǵalǵan adamn tabylmady. Juma kúni quzyrly organdar operatsııany toqtatýǵa májbúr boldy, óıtkeni jer jaryqtaryna kirý qutqarýshylar úshin tym qaýipti dep tanyldy.

Islandııada 33 belsendi janartaý bar, bul basqa Eýropa elderimen salystyrǵanda óte kóp. Sońǵy eń úlken atqylaý 2010 jyly Eııafıadlaıekıýdl janartaýy boldy. Ol kezde janartaý úlken kúl bulttaryn shyǵardy, saldarynan Eýropanyń kóp bóliginde birneshe kún boıy áýe qozǵalysy toqtatyldy.