Іshki ister mınıstrliginiń oqý oryndaryna irikteý talaptary ózgerdi
«Іshki ister organdaryn jańǵyrtý jol kartasy aıasynda vedomstvolyq bilim berýdiń irikteý, oqytý, biliktiligin arttyrý jáne qaıta daıarlaý máselelerin júzege asyrý bóligi jańǵyrtylyp jatyr. Qazir vedomstvolyq bilim berý ońtaılandyrylǵan, oqý oryndary olardyń mamandanýyna qaraı qaldyryldy. Qaraǵandy akademııasy tergeýshiler men krımınalısterdi, Almaty akademııasy – jedel jáne tehnıkalyq qyzmetkerlerdi, Qostanaı akademııasy – ákimshilik polıtsııa jáne qylmystyq-atqarý júıesi qyzmetkerlerin, Aqtóbe ınstıtýty – ákimshilik polıtsııa qyzmetkerlerin, Shymkent oqý ortalyǵy – mamandandyrylǵan kúzet qyzmetin daıarlaıdy», - dedi A. Nuryshev mınıstrliktiń aptalyq brıfıngtinde.
Spıkerdiń aıtýynsha, jańǵyrtý aıasynda oqytý tásilderi aıtarlyqtaı ózgergen, arnaıy polıtsııa taktıkasy, ishki ister qyzmetkerlerin psıhologııalyq daıarlaý, aqparattyq-kommýnıkatsııalyq tehnologııalar syndy jańa arnaıy kýrstar men pánder engizilgen. Kadrlardyń biliktiligin arttyrý jáne qaıta daıarlaý bóliginde qazir barlyq oqý oryndarynda Іshki ister organdarynyń qyzmetkerlerin psıhologııalyq daıarlaý, halyqpen jumystyń servıstik formaty boıynsha kýrstar júrgiziledi.
«Bakalavrıat baǵyty boıynsha JOO-ǵa túskisi keletin talapker mindetti túrde aýmaqtyq ishki ister organdarynyń kadr qyzmetteri arqyly nemese tikeleı oqý oryndaryna ótinim beredi. Sondaı-aq ótinimdi elektrondy túrde berýge bolady, oǵan jeke kýáliktiń kóshirmesi, fotosýretter, ómirbaıan, bilimi týraly qujattyń kóshirmesi qosa beriledi. Aýmaqtyq ishki ister organynyń jáne oqý oryndarynyń kadr qyzmetteri oqý kandıdattaryn qarastyrady, medıtsınalyq kýálandyrýǵa jiberedi, arnaıy tekserý júrgizedi jáne jeke isterin 1 shildege deıin ІІM-niń tıisti joǵary oqý oryndaryna jiberedi», - deıdi A. Nuryshev.
Oqýǵa úmitkerler UBT-ny 5 shildege deıin tapsyrady. UBT Qazaqstan tarıhy, matematıkalyq saýattylyq, oqý saýattylyǵy jáne eki beıindi pán boıynsha ótkiziledi. Jańashyldyqtardyń biri –Qaraǵandy akademııasyna túskisi keletinder kez kelgen eki beıindik pándi tańdaı alady. UBT qorytyndysy boıynsha keminde 50 ball, onyń ishinde árbir pán boıynsha – keminde 5 ball jınaý qajet.
UBT tapsyrǵan soń talapkerler belgilengen merzimge sáıkes oqý ornyna keledi. Oqýǵa qabyldaýdy JOO-nyń qabyldaý komıssııasy úsh kezeńde uıymdastyrady: túpkilikti medıtsınalyq kýálandyrý, talapkerlerdiń dene daıyndyǵyn tekserý, uldar men qyzdar úshin: 100 jáne 1000 metrge júgirý. Uldar bıik beltemirge tartylady, al qyzdar – 1 mınýt boıy arqada jatyp deneni kóteredi. Úshinshi kezeń – medıtsınalyq kórsetkishter men dene shynyqtyrý daıyndyǵynyń nátıjeleri boıynsha irikteýdi eskerip, UBT qorytyndysyna sáıkes talapkerlerdi qabyldaý.
Kandıdatty qyzmetke jaramdylyǵyn anyqtaý úshin medıtsınalyq jáne psıhofızıologııalyq tekserý, sondaı-aq kandıdatty arnaıy esepke alý bazalary boıynsha tekserý júrgiziledi.
Oqý oryndaryna irikteý dalalyq oqý lagerlerinde ótedi. Dene shynyqtyrý daıarlyǵy synaqtarynyń nátıjesimen kelispegen kandıdat apellıatsııaǵa ótinish berýge quqyly. Apellıatsııalyq komıssııany tıisti oqý ornynyń bastyǵy qurady. Ótinish nátıje jarııalanǵannan keıingi kúni saǵat 13.00-ge deıin beriledi. Ótinish táýlik ishinde qaralady. Ótinish bergen árbir kandıdat bir fızıkalyq synaqty qaıta tapsyrýǵa quqyly.
