Іri kompanııalar jumysshylarynyń quqyǵyn buzǵan
Negizinen kompanııalarda jaramsyz órt dabyldary men jeldetý qurylǵylary, qorǵalmaǵan elektr qalqandary, gıdranttar men órt sóndirgishterdiń bolmaýy sııaqty kemshilikter tirkelgen.
«Mysaly, «Qazaqmys korporatsııasy» JShS shahtalarynda jumys shatyrdy retteıtin bekitkishtersiz júrgiziletini anyqtaldy. Osynyń saldarynan kenshiler kez kelgen sátte taý massasynyń astynda qalýy múmkin. Jalpy jazataıym oqıǵalardyń 60% osyndaı zańbuzýshylyqpen baılanysty»
, - deıdi QR Bas prokýratýrasy Qoǵamdyq múddelerdi qorǵaý qyzmetiniń bastyǵy Saparbek Nurpeıisov.
Sonymen qatar, tekseris kezinde 1,5 myńnan astam tehnologııalyq jabdyqtyń qaýipsizdik talaptaryna saı kelmeıtini anyqtalǵan. Al 50-iniń jumysy tolyq toqtatylýy tıis (olarmen 2,5 myńnan astam adam jumys istep júr).
«Azamattardyń eńbek quqyǵyn buzýshylardyń arasynda «Qaztsınk», «Qazhrom», «Qazfosfat», «Araltuz», «Qazaqmys» jáne «Ózenmunaıgaz» kompanııalary bar»
, - dep qosady Saparbek Nurpeıisov.
Aıta ketsek, prokýratýra organdary eńbek qaýipsizdiginiń saqtalýy boıynsha 49 iri kásiporyndy teksergen. Tekserý qorytyndysy boıynsha 69 qadaǵalaý aktisi engizilip, 226 tulǵa ákimshilik jaýapkershilikke tartyldy. 30 myń jumysshynyń jalaqysyna ústemeaqy, 600-den astam jumysshyǵa ótemaqy tólendi. Qorǵanys quraldarymen jáne arnaıy tamaqpen qamtamasyz etý bastaldy. 22 tehnıkanyń jumysy toqtatyldy.
Saparbek Nurpeıisov atap ótkendeı, bul másele Bas prokýrordyń erekshe baqylaýynda.
Budan buryn Bas prokýratýra jalǵan habarlama taratqan 236 azamattyń 147-si sottalǵanyn málim etken.
