Іri kásiporyndarda energııa únemdeý boıynsha jaýapty mamandar bolady

NUR-SULTAN. QazAqparat – Senattyń jalpy otyrysynda «QR Keıbir zańnamalyq aktilerine elektr energetıkasy, energııa únemdeý jáne energııa tıimdiligin arttyrý, jer qoınaýyn paıdalaný, jergilikti memlekettik basqarý jáne memlekettik shekara máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

«Tutastaı alǵanda, zań jobasynda 7 Zań men 2 Kodekske túzetýler kózdelgen. Olar energııa únemdeý jáne energııa tıimdiligin arttyrý salasyndaǵy zańnama normalaryn jetildirýge, otynnyń balamaly túri retinde gazdy paıdalana otyryp, generatsııalaıtyn qondyrǵylardy salýmen qosa jańǵyrtýǵa, rekonstrýktsııalaýǵa ári keńeıtýge ınvestıtsııalardy qaıtarý tetigin engizýge baǵyttalǵan. Sonymen qatar, taqtatas munaıyn óndirýdi damytý, shekara bólimsheleri men memlekettik shekara arqyly ótkizý pýnktterin salý jónindegi máselelerdi sheshý eskerilgen», - dedi QR Indýstrııa jáne ınfraqurylymdyq damý mınıstri Qaıyrbek Óskenbaev.

Onyń aıtýynsha, energııa únemdeýdiń negizgi baǵyttary - bul Memlekettik energetıkalyq tizilim, energııa aýdıti, memlekettik baqylaý, bıýdjettik sektor jáne óńirlik saıasat.

«Elimizdiń energııa tutynýynyń úshten bir bóligin qamtıtyn iri kásiporyndarda energııa únemdeý boıynsha jaýapty tulǵalardy engizý, sondaı-aq barlyq energııa tizilim sýbektileriniń 90%-ǵa jýyǵyn tutynatyn TOP-100 kásiporyn úshin energııa tıimdiligi boıynsha nysanaly ındıkatorlardy belgileý usynylady», - dedi mınıstr.

Energııa únemdeýdiń eleýli áleýeti bar ıe bıýdjet sektoryn retteýdi kúsheıtý maqsatynda mynalar kózdelgen:

- memlekettik mekemelerde energııa tutynýdy azaıtýdy qamtamasyz etetin, sondaı-aq energııa tutynatyn jabdyqtyń qazaqstandyq naryǵyn qaıta qurýǵa serpin beretin energııa tıimdi memlekettik satyp alýdy engizý;

- energııa tutyný normatıvterin belgileý, olardy saqtaý monıtorıngi, benchmarkıng jáne energııa tıimdiligi boıynsha tıisti usynymdar berý usynylady.