Aqtóbeniń Yrǵyz aýdanynda evakýatsııalyq pýnktter sany qysqaryp jatyr
AQTÓBE. KAZINFORM – Aqtóbe oblysy Yrǵyz aýdanynda kúni búginge deıin 4 evakýatsııalyq pýnkt boldy. Aýdan ortalyǵyndaǵy mektepter men ınternatta Nura, Belsher, Mamyr jáne Quılys aýyldarynyń turǵyndary turyp jatyr. Búginde onyń ekeýin qysqartyp, oqý protsesin jalǵastyrý kózdelgen. Kazinform tilshisi ondaǵy jumystyń qalaı uıymdastyrylǵanyn kórip keldi.
Yrǵyz aýdany boıynsha evakýatsııalanǵan turǵyndar 4 ǵımaratta jatyr. Olar: №1 jáne №2 orta mektepter, Y.Altynsarın atyndaǵy mektep pen Yrǵyz gımnatsııasy. Yrǵyz ákimdigi eki mektepti qysqartyp, oqý protsesin birqalypqa túsirýge sheshim qabyldanǵan.
- Y.Altynsarın mektebindegi turǵyndardy №1 orta mektepke, №2 orta mekteptegi adamdardy Yrǵyz gımnatsııasyna kóshiremiz. Barlyǵy 600-den astam adam qaldy,- dedi Yrǵyz aýdany ákiminiń orynbasary Asqar Ýálı.
Yrǵyz aýdanynda eń birinshi №1 orta mektep evakýtsııalyq pýnkt retinde tańdaldy. Mundaǵy ujymdy eki saǵat buryn ǵana eskertip, shuǵyl tazartý, ázirleýge tapsyrma berilgen. Kún saıyn adam sany kóbeıip, 200-den asyp ketse, qazir qarbalas sál saıabysydy. Munda barlyǵy 88 adam bolsa, onyń 36-y bala.
- Eń birinshi kúni ujym tolyq jumysqa keldi. Bizge mektepti ázirleýge 2 saǵat ýaqyt berdi. Jýyp, tazartyp qoıdyq, keıin jaıýdy, tósek-oryndy ákeldi. Ashanaǵa eki adam bekitildi. Mektep psıhologi de jumys istedi. Tótenshe jaǵdaı kezinde úıleri sýǵa ketken adamdardyń keıbiri jylaı bastady. Olardy jubatý kerek boldy. Biz balamen, ata-analarmen jumys istegen soń qıyn bolmady. Qazir qolymyzdan kelgenshe búkil qyzmetti jasap jatyrmyz,- dedi №1 orta mektep dırektorynyń oqý isi jónindegi orynbasary Gúlfara Ákimáliqyzy.
Onyń aıtýynsha, qazir de muǵalimder kezekshilikte. Tek sabaqtan bos ýaqytta járdem beredi. Sonymen birge er adamdar túngi kúzetshilikke qoıyldy.
- Medpýnkt eki mezgil jumys isteıdi. Eń birinshi kúni 4 adamdy aýrýhanaǵa alyp ketti. Óıtkeni olardyń qan qysymy kóterildi. Turǵyndar emdelip, evakýatsııalyq pýnktke keldi, - dedi Gúlfara Ákimáliqyzy.
Al Yrǵyz gımnazııasynda 140 adam jatyr. Buǵan deıin 300-den astam adam bolyp, kóbi páter jaldap, týma-týysynyń úıine ketti.
- Men evakýatsııalyq pýnktke 16-17 sáýir kúnderi keldim. Quılys aýylynan tikushaqpen kóshirdi. Onyń aldynda aýyl ákimi kóshýge daıyn bolý kerek ekenin aıtty. Jınaqtalyp otyrý qajet dedi. Otbasymyzda 7 bala bar. Onyń tórteýi mektepte oqıdy, eń kishkentaıy 6 aılyq. Balalarymyzben birge mekteptiń bir bólmesindemiz. Bizden ózge taǵy 3 otbasy bar. Barlyǵymyz 24 adam bolyp jatyrmyz. Men balalarymmen evakýatsııalyq pýnktke kelgende joldasym sol jaqta qaldy, - Quılys aýylynyń turǵyny Almagúl Pirmanova.
Mektepte jatqan otbasy balalary sabaqty ekinshi qabatta oqıdy. Olarǵa óz mektebiniń muǵalimderi sabaq beredi. Oqý quraldarynyń bári – elektrondy.
- Men Quılys aýylynan tikushaqtyń ekinshi reısimen keldim. Sodan evakýatsııalyq pýnktke qabyldady. Alǵashqy kúni jalǵyz jattym, qazir kelinim bar tórt nemeremmen. Ózimniń qan qysymym joǵary bolǵan soń osynda otyrmyn. Dárigerlerge de qaralyp alamyn. Barlyǵy 16 jan bar osy bólmedi. Úıden eshteńe de alyp shyqpadyq. Bir sómkege kıim men qujattarymyz salyndy. Ózim sol jaqta qalǵym kelgen, biraq kónbedi adamdar, - dedi Saragúl Aldabaeva.
Eske salsaq, Yrǵyz aýdanynda 8 sáýir kúni tótenshe jaǵdaı jarııalandy. Qazir munda úsh aýylda úılerdi sý basty.
Nura aýylyn kóshirý úshin jer tańdalyp jatyr.
