Irannyń vıtse-prezıdenti otstavkaǵa ketti

ASTANA. KAZINFORM – Masýd Pezeshkıan prezıdenttik saılaýda jeńiske jetkennen keıin bul qyzmetke kelgen Irannyń strategııalyq ister jónindegi vıtse-prezıdenti Djavad Zarıf atalmysh laýazymyn 10 kún atqarǵannan keıin otstavkaǵa ketti. 

Djavad Zarıf úkimetke kandıdattardy tańdaýy tıis konsýltatıvtik keńesti basqardy. Pezeshkıan jeksenbi kúni parlamentte mınıstrlik laýazymdaryna úmitkerlerdi tanystyrdy.

Zarıf X áleýmettik jelisindegi jazbasynda «tórt apta boıy kúndiz-túni jumys istep, myńnan astam kandıdatty qarastyrǵan» áriptesterine rızashylyǵyn bildirdi. Alaıda saıasatkerdiń ózi keńes basyndaǵy jumysynyń nátıjesine kóńili tolmaıtynyn málimdedi. Ol áıelderdi, jastardy jáne etnıkalyq toptardy mınıstrler kabınetine qosý týraly ýádelerin oryndaı almaǵanyna ókindi, bul ol qoldaǵan progressıvti kún tártibinen sheginýdi bildiredi. 

سلام بر مردم بزرگوار و خطاپوش ایران
امروز جناب دکتر پزشکیان وزرای دولت چهاردهم را به مجلس معرفی فرمودند که برای همگی آرزوی موفقیت دارم.
از نوزده وزیری که امروز معرفی شدند، سه نفر نامزد نخست، 6 نفر نامزد دوم یا سوم و یک نفر نامزد پنجم کمیته‌ها و یا شورای راهبری بودند.
بارها گفته… pic.twitter.com/lbuWQE213H

— Javad Zarif (@JZarif) August 11, 2024

Bir kezderi Zarıf álemdegi eń iri derjavalarmen 2015 jylǵy ıadrolyq kelisim boıynsha kelissózder júrgizdi. Endi ol akademııalyq salaǵa oralyp, ishki saıasatqa az kóńil bólýdi josparlap otyrǵanyn aıtty. Saıasatker 2007 jyldan bastap Tegeran ýnıversıtetiniń Halyqaralyq qatynastar mektebinde sabaq berdi. 

Iran saıasatynda Zarıf reformatorlar qanatynyń ókili sanalady. Atap aıtqanda, ol AQSh-pen dıalogty jaqtaıdy. Sol úshin konservatorlar tarapynan jıi synǵa ushyraıdy.

Ol otstavkaǵa ketetini týraly kópshilikke habarlaǵannan keıin taǵy da synnyń astynda qaldy. 

سلام بر مردم بزرگوار ایران
پیام دیشب بنده به‌معنای پشیمانی و یا ناامیدی از دکتر پزشکیان عزیز و یا مخالفت با واقع‌گرایی نیست؛ بلکه به معنای تردید در مفید بودن خودم در معاونت راهبردی است.
البته برخی مردودین از جانب مردم، با تفسیر عجیبی از قانون مصوب 1401، اشتغال بنده در مشاغل حساس… pic.twitter.com/OtLynZe4DH

— Javad Zarif (@JZarif) August 12, 2024

Iran parlamentiniń múshesi Hamıd Rasaı Djavad Zarıftiń jáne otbasy músheleriniń sheteldik azamattyǵy bar dep aıyptady. Zarıftiń synshylary 2022 jyldyń 2 qazanynda qabyldanǵan «mańyzdy laýazymdarǵa taǵaıyndaý týraly» zańǵa silteme jasaıdy. Zań eki azamattyǵy bar adamdarǵa, olardyń jubaılaryna nemese balalaryna «mańyzdy» laýazymdarǵa, sonyń ishinde Prezıdenttiń keńesshileri nemese orynbasarlary laýazymdaryna taǵaıyndalýǵa tyıym salady. 

Dúısenbi kúngi kezekti jazbasynda Zarıf otstavkaǵa ketýiniń birneshe sebebin atady. Sonyń ishinde balalary AQSh azamaty bolǵandyqtan oǵan qyzmetke taǵaıyndalǵannan keıin kóp qysym kórsetilgen. 

– Zarıf eńbek jolynyń mańyzdy bóligin Nıý-Iorkte BUU-daǵy Iran mıssııasynyń bir bóligi retinde ótkizdi. Balalary jumys istep júrgen kezinde sol jaqta týǵandyqtan, avtomatty túrde AQSh azamattyǵyn aldy. Onyń balalary qazir Iranda turyp jatqanymen, bul fakt Zarıftiń vıtse-prezıdent laýazymyn atqarý quqyǵynan aıyrdy, - dep habarlaıdy ırandyq BAQ.