Iranǵa qarsy «Tún ortasyndaǵy balǵa» operatsııasy: Pentagon jan-jaqty málimet berdi

ASTANA. KAZINFORM – Pentagon Irannyń 3 ıadrolyq nysanyn bombalaý operatsııasynyń egjeı-tegjeıin málimdedi, dep habarlaıdy Kazinform agenttiginiń menshikti tilshisi CBS News-ke silteme jasap.

- Bul barynsha qupııalandyrylǵan mıssııa boldy jáne atalǵan jospardyń merzimi men sıpatyn Vashıngtondaǵy saýanaýly adam ǵana bildi, - dedi jeksenbi kúni Pentagonda ótken brıfıngte general Den Keın.

Keınniń aıtýynsha, «Operation Midnight Hammer» ataýyn alǵan mıssııada jeti B-2 Spirit bombalaýshy ushaǵy boldy. Olar Iranǵa áýeden soqqy jasaý úshin Ýaıtmen áýe bazasynan shyǵysqa qaraı, Mıssýrıge ushyp shyqty. Al V-2 ushaǵynyń kelesi toby aldaýshy áser qaldyrý úshin Tynyq muhıty arqyly batysqa, amerıkalyq Gýam áskerı-teńiz bazasyna qaraı baǵyt aldy.

Ushaqtar shyǵysqa qaraı 18 saǵat ushty. Bombalaýshy ushaqtar Atlant muhıty men Jerorta teńizin kesip ótýi úshin áýede birneshe márte janarmaı quıyp alýlaryna týra keldi.

Ushaqtar Iran áýe keńistigine kirerdiń aldynda amerıkalyq súńgýirler Isfahandaǵy nysandarǵa «Tomagavk» dep atalatyn jıyrmadan astam qanatty zymyranmen soqqy jasady. Bombalaýshy ushaqtar dittegen nysanǵa jaqyndaǵan sátte joıǵysh ushaqtar olardyń aldyndaǵy áýe keńistigin tazalap, jaý ushaqtary men «jer-áýe» sanatyndaǵy zymyrandardyń bolmaýyn tekserip otyrdy.

25 mınýttyń ishinde Fordo men Natanzdaǵy nysanalarǵa GBU-57 Massive Ordnance Penetrators (MOR) degen ataýmen tanymal jalpy 14 «býnkerlik» bomba tastaldy.

Keınniń atap ótýinshe, amerıkalyq ushaqtar Iran áýe keńistiginen shyǵyp bara bara jatqan kezde olarǵa birde-bir oq atylǵan joq.

- Irannyń joıǵysh ushaqtary áýege kóterilgen joq. Jalpy, ırandyq «jer-áýe» zymyran júıesi bizdi baıqamaı qalǵan sııaqty. Búkil mıssııa barysynda tosynnan soqqy jasaý áleýmeti saqtaldy, - dedi Den Keın.

Áýe operatsııasyna V-2 bombalaýshy ushaqtaryn, joıǵysh ushaqtardy, janarmaı tasymaldaıtyn ushaqtar men barlaýshy ushaqtardy qosa alǵanda 125-ten astam áýe kemesi qatysty. Shabýyl barysynda 75-ten astam joǵary dáldikti qarý qoldanyldy.

Shabýyl barysynda kelgen shyǵyndy aldyn ala baǵalaýǵa qaraǵanda, úsh nysannyń barlyǵy da óte qatty búlingen.

Pentagon ókili Irandy qandaı da bir qarymta shabýyl jasaýdan aýlaq bolýǵa shaqyrdy.

- Bizdiń kúshtik qurylymdarymyz joǵary daıyndyq deńgeıinde qala beredi jáne Irannyń kez kelgen qarymta is-qımylyna nemese proksı-shabýyldaryna qarsy áreket etýge tolyǵymen daıyn. Olardyń mundaı qadamǵa barýy barynsha sátsiz tańdaý bolar edi. Biz qorǵanamyz, - dep málimdedi Den Keın.

Aıta keterligi, Aq úı basshysy Donald Tramp Qurama Shtattardyń Qarýly kúshteri Iran rejıminiń úsh mańyzdy ıadrolyq nysanyna — Fordo, Natanz jáne Isfahanǵa dáldikpen, aýqymdy soqqylar jasaǵannan keıin halqyna úndeý jasaǵan edi. 

- Bizdiń maqsatymyz — Irannyń ýran baıytý ınfraqurylymyn joıý jáne búkil álemge ıadrolyq qaýip tóndirip otyrǵan, terrorızmniń basty demeýshisi sanalatyn memleketten bul qaýiptiń kózin qurtý. Búgin búkil álemge aıta alamyn: bul soqqylar — aıryqsha áskerı jetistik... Bizge bul áskerdiń qyzmeti budan bylaı qajet bolmaıdy dep úmittenemin. Nemese beıbitshilik ornaıdy, nemese Iran sońǵy segiz kúnde kórgeninen de qorqynyshty tragedııamen betpe-bet keledi, - dedi Donald Tramp.

Qorǵanys mınıstri Pıt Hegset bul shabýyldy «aqylǵa syımaıtyn ári tań qalarlyq» dep sıpattady.

- Prezıdent Tramp josparlaǵan operatsııa batyl ári tamasha boldy jáne álemge amerıkalyq tejeýdiń oralǵanyn kórsetti. Prezıdent aıtqan kezde álem oǵan qulaq asýy tıis, - dep málimdedi Pıt Hegset.

Memlekettik hatshy Marko Rýbıo «Face the Nation with Margaret Brennan» baǵdarlamasynda sóılegen sózinde Irandy dıplomatııany jalǵastyrýǵa shaqyryp, AQSh-tyń Iranǵa qarsy budan ári shabýyl jasaý jospary joq ekenin habarlady.

Rýbıonyń málimdeýinshe, AQSh mıssııasy «Iranǵa, Iran halqyna shabýyl jasaý emes. Bul rejımdi ózgertýge baǵyttalǵan qadam bolǵan joq. Bul qadam ıadrolyq qarý jasaý ambıtsııalarymen baılanysty úsh ıadrolyq nysandy joıýǵa baǵyttaldy jáne ol keshe oryndaldy».

- Endi ne bolatyny Irannyń ári qaraıǵy sheshimine baılanysty bolady. Olar dıplomatııa jolyn tańdasa, biz daıynbyz. Biz olar úshin de, Iran halqy úshin de, álem úshin de tıimdi mámile jasaı alamyz. Eger olar basqa joldy tańdasa, onyń saldary bolady, - dedi Marko Rýbıo.

Al Túrkııa prezıdenti ákimshiliginiń kommýnıkatsııalar basqarmasynyń dırektory Fahrettın Altýn Irannyń ıadrolyq nysandaryna jasalǵan AQSh-tyń áýe soqqylary men Izraıldiń Iranǵa qarsy agressııasyna Vashıngtonnyń qosylýyn qatań synǵa aldy.

Ol bul áreketter Taıaý Shyǵysta beıbitshilik pen turaqtylyqqa emes, kerisinshe, jańa deńgeıdegi haos pen beıbereketsizdikke aparatynyn málimdedi.

- AQSh-tyń Irandaǵy ıadrolyq nysandarǵa jasaǵan áýe soqqysy jáne Izraıldiń Iranǵa qarsy agressııasyna qosylýy — bul beıbitshilik pen turaqtylyqqa emes, haos pen tártipsizdikke aparatyn jańa qadam, — dedi Altýn.

Búgin AQSh-tyń Irandaǵy ıadrolyq nysandarǵa jasaǵan shabýylyna baılanysty Irannyń BUU janyndaǵy elshisi ári turaqty ókili Amır Saıd Iravanı jeksenbi kúni BUU Bas hatshysy men Qaýipsizdik Keńesiniń tóraǵasyna resmı hat joldaǵany belgili boldy. 

— Iran Islam Respýblıkasy eshqandaı arandatýshylyq sebepsiz jasalǵan bul aldyn ala josparlanǵan agressıvti áreketterdi qatań túrde aıyptaıdy. Bul shabýyldar — 13 maýsymda Izraıl rejımi Irannyń beıbit ıadrolyq nysandaryna jasaǵan aýqymdy áskerı operatsııasynyń jalǵasy, — delingen hat mátininde.