Irandaǵy narazylyqtar: el prezıdenti dıalogqa daıyn ekenin málimdedi

ASTANA. KAZINFORM – Iran astanasynda jáne basqa da iri qalalarynda eldiń qıyn ekonomıkalyq jaǵdaıyna baılanysty 28 jeltoqsannan beri jappaı narazylyq sharalary ótip jatyr.

Euronews  habarlaýynsha, sońǵy úsh jyldaǵy eń iri narazylyq aktsııalary dúısenbi kúni rıaldyń tarıhı mınımýmǵa deıin kúrt tómendeýi jáne Iran Ortalyq bankiniń tóraǵasy Mohammed Reza Farzınniń otstavkaǵa ketýi aıasynda ótti. 

Narazylyq aktsııalary Tegerannyń Grand-bazary aınalasyndaǵy aýdandarda ótti, onda jergilikti saýdagerler dúkenderin jappaı jaýyp jatyr. Olarǵa Isfahan, Shıraz jáne Meshhed sııaqty basqa da iri qalalarda qoldaý kórsetildi.

Narazylyq bildirýshiler men polıtsııa arasynda «bolmashy» qaqtyǵystar oryn alǵan, quqyq qorǵaý organdary jınalǵandardy taratý úshin kózden jas aǵyzatyn gaz qoldandy.

Ashyq naryqtaǵy baǵamdardy baqylaıtyn veb-saıttardyń málimetterine sáıkes, dúısenbide rıal jańa rekordtyq deńgeıge deıin tómendep, bir dollarǵa shaqqanda shamamen 1,4 mln teńgege jetti. Bul rette áńgime Ortalyq banktiń baǵamyna emes, qarapaıym adamdar ustanatyn baǵamǵa qatysty bolyp otyr. Ádette Iranda naryq baǵamy memlekettikinen joǵary bolady.

Irandyqtar qarjy daǵdarysy ýshyǵyp ketedi dep alańdaıdy. Valıýtanyń kúrt qunsyzdanýy úı sharýashylyqtaryna ınflıatsııalyq qysymdy kúsheıtip, azyq-túlik pen kúndelikti taýarlar baǵasynyń ósýine ákelip soqtyryp otyr.

Memlekettik statıstıka ortalyǵynyń málimetinshe, jeltoqsandaǵy ınflıatsııa 2024 jyldyń sáıkes kezeńimen salystyrǵanda 42,2%-ǵa deıin ósti. Jyldyń sońǵy aıynda azyq-túlik baǵasy 72%-ǵa, al dári-dármek pen medıtsınalyq buıymdardyń baǵasy 12 aı burynǵy jaǵdaımen salystyrǵanda 50%-ǵa ósti.

Anadolu aqparat agenttiginiń habarlaýynsha, Iran prezıdenti Masýd Pezeshkıan narazylyq bildirýshilermen dıalog ornatýdy buıyrdy. H áleýmettik jelisindegi málimdemesinde Pezeshkıan halyq aldynda turǵan ekonomıkalyq máseleler onyń basty ekenin atap ótti.

- Men Іshki ister mınıstrine narazylyq bildirýshilermen dıalog negizinde kelissóz júrgizýdi jáne olardyń negizdelgen talaptaryn tyńdaýdy tapsyrdym. Úkimet bar máselelerdi sheshý úshin sharalar qabyldaıdy, - dep atap ótti ol.

Iran prezıdenti sondaı-aq bank júıesin jaqsartý jáne halyqtyń satyp alý qabiletin saqtaý úshin qajetti qadamdar jasaý nıetin málimdedi.

Buǵan deıin fermerler Eýroparlament ǵımaratynyń aldynda búlik shyǵarǵanyn jazǵan edik.