Iranda jańa qorǵanys keńesi quryldy

ACTANA. KAZINFORM – Jańa organ qorǵanysty josparlaý jáne armııany jańǵyrtý salasyndaǵy úılestirýdi kúsheıtýge arnalǵan, dep habarlaıdy Kazinform tilshisi. 

Irannyń Ulttyq qaýipsizdik joǵary keńesi qorǵanys strategııalaryn ázirleıtin jáne qarýly kúshterdiń múmkindikterin ortalyqtandyratyn túrde kúsheıtetin Qorǵanys keńesin qurýdy maquldady. 

IRNA agenttiginiń habarlaýynsha, jańa organ Iran Konstıtýtsııasynyń 176-babyna sáıkes qurylǵan. Onyń negizgi mindetteri – qorǵanys josparlaryn baǵalaý, uzaq merzimdi áskerı tásilderdi ázirleý jáne qarýly kúshterdiń tıimdiligin arttyrý. 

Keńesti Iran prezıdenti Masýd Pezeshkıan basqarady. Onyń quramyna bıliktiń úsh tarmaǵynyń, eldiń joǵary áskerı qolbasshylyǵynyń basshylary, sondaı-aq tıisti mınıstrlikterdiń ókilderi kiredi. 

– Jańa qorǵanys organy ortalyqtandyrylǵan túrde qorǵanys josparlaryn qarastyrady jáne Iran qarýly kúshteriniń múmkindikterin arttyrady, - delingen Ulttyq qaýipsizdik joǵary keńesiniń hatshylyǵynyń málimdemesinde. 

Fars agenttiginiń habarlaýynsha, Keńesti qurý týraly sheshim ulttyq qaýipsizdik júıesin keń aýqymdy reformalaý aıasynda qabyldanǵan. Buǵan deıin osyǵan uqsas organ 1980 jyldary Iran-Irak soǵysy kezinde Iranda jumys istegen. 

Izraılmen jalǵasyp jatqan shıelenis jaǵdaıynda Iran armııasynyń qolbasshysy Amır Hatamı jeksenbi kúni Tel-Avıvten keletin qoqan-loqqylar «mańyzdy bolyp qala beredi jáne ony elemeýge bolmaıdy» dep atap ótken bolatyn.