Iranda Izraıl shabýyldarynan qaza tapqandar sany 950 adamǵa jetti

ASTANA. KAZINFORM – Izraıldiń Iranǵa jasaǵan shabýyldarynan qaza tapqandar sany 950 adamǵa jetip, shamamen 5 myń adam jaralandy. Bul týraly Iran Qyzyl Jarty Aı qoǵamynyń basshysy Pır Hosseın Kolıvand málimdedi, dep jazady TASS.

– Sıonıstik rejımniń elimizge jasaǵan sońǵy agressııasy saldarynan 950 otandasymyz qaza tapty. Qurbandar arasynda 102 áıel men 38 bala bar. Jaralanǵandardyń jalpy sany – shamamen 5 myń, olardyń 70 paıyzy beıbit turǵyndar, – dep keltiredi Defa Press Kolıvandtyń sózin.

30 maýsym kúni Iran sot bıliginiń ókili Asgar Djahangır qaza tapqandar sany 935 adam ekenin habarlaǵan bolatyn.

Kolıvandtyń aıtýynsha, Izraıl shabýyldarynan 377 turǵyn úı tolyǵymen qırap, taǵy 2 160 úı búlingen.

Buǵan deıin Iran úkimetiniń ókili Fateme Mohadjeranı Izraıldiń soqqylary kezinde 5 646 ırandyqtyń jaralanǵanyn habarlaǵan.

Izraıl 13 maýsymǵa qaraǵan túni Iranǵa qarsy áskerı operatsııa bastaǵan.

Araǵa bir kún salyp, Islam Respýblıkasy qarymta soqqy berdi.

AQSh bul qaqtyǵysqa toǵyz kúnnen keıin aralasyp, 22 maýsymǵa qaraǵan túni Irandaǵy úsh ıadrolyq nysanǵa soqqy jasady.

23 maýsym keshke Tegeran Katarda ornalasqan Taıaý Shyǵystaǵy eń iri amerıkalyq «Ál-Ýdeıd» áskerı áýe bazasyna zymyranmen soqqy berdi. AQSh bıliginiń habarlaýynsha, zardap shekkender joq, eleýli zalal keltirilmegen.

Keıinirek AQSh prezıdenti Donald Tramp Izraıl men Irannyń tolyq atysty toqtatýǵa kelisim bergenin málimdedi. Bitim 24 maýsymnan bastap kúshine endi.