Voleıbol: «Jaıyq» klýby Aqtóbede Atyraýdan basym tústi

ASTANA. KAZINFORM – Aqtóbe jáne Taldyqorǵan qalalarynda voleıboldan erlerdiń ulttyq lıga komandalary arasynda Qazaqstan chempıonatynyń tórtinshi kishi týr oıyndary bastaldy.

Aqtóbe qalasynda «A» tobynda «Aqtóbe», «Jaıyq», «Atyraý» jáne «Esil» (SQO) klýbtary synǵa túsip jatyr.

Taldyqorǵanda «V» tobynda «Jetisý», «Býrevestnık» (Almaty), «Taraz», «Ushqyn-Kókshetaý» ózara sheberlik baıqasady.

Aqtóbede búgin ortalyq match ótken jylǵy el chempıony «Jaıyq» pen «Atyraý» arasynda boldy. Osyǵan deıin qos komanda 44 upaımen týrnır kestesinde úshinshi-tórtinshi oryndy bólisip turǵan edi.

Vıktor Kozık jattyqtyratyn oraldyqtar bastapqy eki setti óz esebine jazdy – 25:23, 25:21. Budan keıin Igor Nıkolchenkonyń shákirtteri esepti qysqartty – 25:23. Degenmen tórtinshi partııada «Jaıyq» kezdesýdi támamdaı bildi – 25:17. Qorytyndy esep – 3:1.

Osylaısha, «Jaıyq» voleıbolshylary upaı sanyn 47-ge jetkizdi.

Taldyqorǵanda tartysty kezdesýde «Ushqyn-Kókshetaý» Almatynyń «Býrevestnıginen» aılasyn asyryp ketti – 3:2 (22:25, 25:20, 26:24, 25:27, 15:13).

Tórtinshi kishi týr oıyndary 26 aqpanda aıaqtalady.

Eske sala keteıik, budan buryn «Aqtóbeniń» 7 match boıy jeńilmeı kele jatqan «Jetisýdy» utqanyn jazǵan edik.