Iranda 6 eldiń ókili Aýǵanstandaǵy jaǵdaıdy talqylaıdy

ASTANA. KAZINFORM — Kelesi aptada Iranda Pákistan, Qytaı jáne Reseı sııaqty alty eldiń ókilderimen kezdesý ótip, taraptar Aýǵanstandaǵy jaǵdaıdy talqylaıdy.

Report agenttiginiń málimetinshe, bul týraly Iran Syrtqy ister mınıstrliginiń resmı ókili Esmaıl Bagaı málimdegen.

— Iran Islam Respýblıkasy kórshiles elderdegi qaýipsizdik pen turaqtylyqqa asa mán beredi jáne osyǵan baılanysty aımaq elderi arasyndaǵy shıelenisti azaıtý jáne olardyń arasyndaǵy ózara túsinistikti nyǵaıtý úshin bar kúsh-jigerin salady, — dedi ol.

Bagaıdyń aıtýynsha, bul kezdesý kelesi aptada Pákistan, Tájikstan, Ózbekstan, Túrkimenstan, Qytaı jáne Reseıdiń Aýǵanstan isteri jónindegi arnaıy ókilderiniń qatysýymen Tegeranda ótedi.

Osyǵan deıin Qazaqstan Prezıdentiniń Aýǵanstan jónindegi arnaıy ókili Kabýlǵa jumys saparymen barǵany týraly jazdyq. Arnaıy ókil Erkin Tuqymovtyń sapary 14 jeltoqsanǵa deıin jalǵasady.