Iran júkti áıelderdiń densaýlyǵyn saqtaý salasynda birinshi orynǵa qalaı jetti? - sheteldegi qazaq baspasózi
«KAZINFORM» HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstanda plastık paketterge tyıym salynýy múmkin - «ÓzA»
2027 jyldan bastap plastık paketterdi óndirý, ımporttaý jáne paıdalanýǵa tyıym salynýy, sondaı-aq ekologııalyq turǵydan zııansyz (bıoydyraıtyn) paketterdi qoldanýdy yntalandyrý josparlanýda, dep habarlaıdy ózbekstandyq «ÓzA» aqparat agenttigi.
Atalǵan BAQ-tyń dereginshe, Ózbekstanda 2025−2027 jyldarǵa arnalǵan plastıkpen lastanýdy azaıtý boıynsha ulttyq baǵdarlama jobasyn ázirleý kózdelip otyr. Bul bastama qoǵam talqylaýyna usynylǵan «Ózbekstan–2030» strategııasy sheńberindegi «Qorshaǵan ortany qorǵaý jáne «jasyl ekonomıka» jylynda júzege asyrylatyn memlekettik baǵdarlama» jobasynda qarastyrylǵan.
Atap aıtqanda, 2027 jyldan bastap plastık paketterdi óndirý, ımporttaý jáne paıdalanýǵa tyıym salynyp, bıoydyraıtyn paketterdi qoldaný yntalandyrylatyny usynylǵan.
Sonymen qatar, plastık ónimderiniń quramyndaǵy zııandy hımııalyq zattardy shekteý jáne oramalarda qaıta óńdelgen plastıkti paıdalaný koeffıtsıentterin belgileý josparlanyp otyr.
Aıta keteıik, qazirgi ýaqytta álemniń keıbir memleketterinde plastık paketterdi paıdalanýǵa tolyq tyıym salynǵan. Sondaı-aq plastık paketterge ishinara tyıym salǵan nemese olardy paıdalanýǵa joǵary salyq salynǵan elderde bar.
Sondaı-aq osy aptada «ÓzA»-da «Ózbekstan men Qazaqstan SІM telefon arqyly sóılesti» degen taqyryptaǵy aqparat jarııalandy.
«ÓzA» aqparat agenttiginiń dereginshe, Ózbekstan Respýblıkasy syrtqy ister mınıstri Bahtıer Saıdov Qazaqstan Respýblıkasy Premer-mınıstriniń orynbasary jáne syrtqy ister mınıstri Murat Nurtileýmen telefon arqyly sóılesti.
SІM málimetinshe, suhbat barysynda strategııalyq seriktestik pen odaqtastyq qatynastardy tereńdetý, búkil Ortalyq Azııa aımaǵynyń órkendeýin arttyrý, sondaı-aq jahandyq máselelerdi sheshýde yntymaqtastyqty damytý máseleleri talqylanǵan.
Iran júkti áıelderdiń densaýlyǵyn saqtaý salasynda birinshi orynǵa qalaı jetti ? - «ParsToday»
Sońǵy jıyrma jylda nazar aýdarǵan mańyzdy máselelerdiń biri – Irannyń densaýlyq saqtaý júıesiniń Batys Azııa aımaǵy men álem elderi arasyndaǵy orny. Aımaqtaǵy jáne odan tysqary eldermen salystyrǵanda Irannyń densaýlyq saqtaý júıesiniń artyqshylyǵy bar, kórnekti orynǵa ıe jáne bul qolaıly jaǵdaı Irannyń aımaqtaǵy densaýlyq saqtaý salasyndaǵy eń mańyzdy elderdiń qatarynda bolýyna negiz saldy, dep jazady «ParsToday».
«Pars Today» agenttiginiń habarlaýynsha, osyǵan baılanysty Iran sońǵy jyldary júkti analardyń densaýlyǵyn saqtaý salasynda aıtarlyqtaı jetistikterge jetken. Ana óliminiń aıtarlyqtaı tómendeýi eldiń mańyzdy artyqshylyǵynyń biri bolyp tabylady. Osy turǵydan alǵanda, Iran júkti ana ólimin azaıtý boıynsha damý maqsattaryna qol jetkize alǵan sanaýly elderdiń biri bolyp tabylady.
Iran Islam Respýblıkasynyń Densaýlyq mınıstri Muhammadreza Zafarqandıdiń aıtýynsha, Iran júkti ana ólimin azaıtý boıynsha álemdegi alǵashqy 3 eldiń qatarynda. Bul qurmet kóp jylǵy qajyrly eńbektiń jemisi.
Bul jaǵdaı Iran úkimetiniń, densaýlyq ortalyqtary men uıymdarynyń aýqymdy kúsh-jigeriniń nátıjesi ekeni anyq jáne qabyldanǵan mańyzdy sharalardyń keıbiri aıtylady.
Atap aıtqanda, densaýlyq saqtaý ınfraqurylymyn damytý, skrınıngtik baǵdarlamalar, bilim berý men aqparattandyrý jáne tabıǵı bosanýdy nasıhattaý. Sondaı-aq dári-dármek pen taǵamdyq qospalardy tegin taratý jáne bala emizetin analardy qoldaý qatarly segiz túrli mańyzdy sharalardy qabyldaǵan.
Qazaqstanda jańa áýejaılar salynady - TRT
Qazaqstanda 2030 jylǵa qaraı kólik ınfraqurylymyn jaqsartý boıynsha aýqymdy joba júzege asyrylady. Qazaqstanda avıatsııa salasyndaǵy mańyzdy ınfraqurylymdyq jobalardy júzege asyrý bastaldy.
Qazaqstan Prezıdenti Qasym-Jomart Toqaevtyń tapsyrmasy boıynsha kólik ınfraqurylymyna 9 trıllıon teńgeden astam ınvestıtsııa salynady.
Bul týraly osy aptada Túrkııa Radıo Televızııa portaly habarlady.
Atalǵan BAQ-ta habarlaǵandaı, 2025 jyly Katonqaraǵaı, Zaısan jáne Kendirli kýrorttyq aımaqtarynda jańa áýejaılar salynady.
Jańartylatyn jańa joldardyń jalpy uzyndyǵy 4,7 myń shaqyrymdy quraıdy. Temirjol kóligi salasynda da birqatar aýqymdy jańǵyrtý jumystary júrgizilmek.
Teńiz kóligin damytý úshin Aqtaý portynda konteınerlik ortalyqtyń qurylysy bastaldy. Osylaısha porttyń jyldyq júk ótkizý qabileti arttyrylady.
«Bul bastama Qazaqstannyń halyqaralyq logıstıkalyq arenadaǵy ornyn nyǵaıtady. Ázerbaıjan, Grýzııa jáne Túrkııa arqyly ótetin Transkaspıı baǵyty boıynsha konteınerlik tasymaldaýdy arttyrady. Ol tranzıttik júktiń bir bóligin Qytaıdan Eýropaǵa baǵyttaıdy», dep jazady túrkııalyq basylym.
Qytaılyq sportshylar Harbın Qysqy Azııa oıyndarynda kıetin kıim úlgilerin kórsetti - «Halyq gazeti»
2025 jyly 9-ynshy Qysqy Azııa oıyndarynda Qytaı sport delegatsııasynyń marapatqa ıe bolǵan kezde kıetin kıim úlgisi Harbınde jarııalandy, dep jazady qytaılyq «Halyq gazeti» basylymy.
Aıta keteıik, atalǵan kıim úlgilerin kórsetýde qytaılyq BAQ-tardaǵy basty sýrette Beıjińdegi Qysqy Olımpıada oıyndarynyń chempıony Sıýı Mentao men qytaılyq qandasymyz konkıshi Ahnar Adaqtyń sýreti turdy.
9 qańtar kúni Harbın qalasynda 2025 jylǵy toǵyzynshy qysqy Azııa oıyndarynda Qytaı sport delegatsııasynyń marapatqa ıe bolǵan kezde kıetin kıimderi men jabdyqtary resmı túrde jarııa etildi. Beıjińdegi Qysqy Olımpıada oıyndarynyń chempıony Sıýı Mentao, qytaılyq short-trekshiler Lıý Gýanı men Zang Idze, qytaılyq konkıshiler Ahnar Adaq pen Dý Haonan podıýmdar arqyly Qytaı sport delegatsııasynyń marapatqa ıe bolǵan jabdyqtaryn kórsetti.
Sondaı-aq osy aptada qytaılyq «Halyq gazeti» basylymynda «2024 jyly Qytaı-Qazaqstan shekarasyndaǵy Alashankoý-Dostyq porty arqyly 210 000-nan astam adam ótken» degen taqyryptaǵy aqparat jaryq kórdi.
Shyńjańdaǵy Alashankoý shekara ótkizý pýnktin basqarý departamentiniń málimetterine sáıkes, 2024 jyldyń sońyna qaraı Qytaı-Qazaqstan shekarasyndaǵy Alashankoý-Dostyq porty arqyly qos baǵytta 216 000 adam ótip, 69%-ǵa artty.
Qytaılyq BAQ-tyń dereginshe, ótken jyly portta táýligine eń kóbi 320 adam ótken, al kúndelikti halyqaralyq avtobýstardan kúnine eń kóbi 8 kólik jolǵa shyqqan.
Jolaýshylar aǵynynyń sharyqtaý kezeńinde kedendik rásimdeýdiń tıimdiligin arttyrý maqsatynda jergilikti shekara jáne keden qyzmetkerleri aǵylshyn, qazaq, orys sııaqty birneshe tilde qyzmet kórsetedi.