Iran narazylyqtar kezinde ustalǵandardyń isin sotta jedel qaramaq

ASTANA. KAZINFORM – Iran bıligi jaqynda bolǵan buqaralyq narazylyq sharalaryna qatysýshylardyń isin jedel tártippen qaramaq, dep habarlaıdy Kazinform menshikti tilshisi.

Iran sot bıliginiń basshysy Ǵolıamhoseın Mohsenı-Edjeı sársenbi kúni narazylyq aktsııalaryna baılanysty qamaýǵa alynǵan kúdiktilerdiń isteri jedel tártippen qaralýy tıis ekenin málimdedi. Resmı Tegeran bul aktsııalardy «tártipsizdikter» dep ataıdy. Mohsenı-Edjeıdiń bul sózderin ırandyq memlekettik telearna taratty.

— Eger bireý adamdy órtep jiberse, bireýdiń basyn shaýyp, artynan órtese, onda biz tez áreket etýimiz kerek, — dedi ol narazylyqqa qatysqany úshin ustalǵandar otyrǵan túrmege barǵan sapary barysynda.

Sot bıligi basshysynyń bul málimdemesi AQSh prezıdenti Donald Tramptyń Irandaǵy narazylyq bildirýshilerge qoldaý kórsetetinin aıtqan soń keıin bir kún ótkennen keıin jasaldy.

— Eger bul is eki-úsh aıǵa sozylsa, onyń áseri de álsireıdi. Qajetti dúnıeniń bárin jedel atqarý kerek, — dep qosty Mohsenı-Edjeı.

Iran aqparat agenttikteriniń habarlaýynsha, ol sot protsesterin ashyq formatta ótkizýdi qoldaıtynyn aıtyp, Tegerandaǵy túzetý mekemeleriniń birinde shamamen bes saǵat bolyp, ustalǵandardyń is materıaldarymen jeke tanysqanyn jetkizgen.

Mohsenı-Edjeıdiń aıtýynsha, bılik narazylyqtardy uıymdastyrýshy, aıdap salýshy jáne úılestirýshi dep sanaıtyn tulǵalardyń, sondaı-aq terrorıstik áreketke qatysy bar dep aıyp taǵylǵandardyń isteri qoldanystaǵy zańnama aıasynda basym tártippen qaralýy tıis.

Al quqyq qorǵaý uıymdary Irandaǵy narazylyqtar kezinde myńdaǵan adam ustalǵanyn aıtyp, sot júıesi ólim jazasyn keńinen qoldanýy múmkin degen alańdaýshylyq bildirip otyr.

Irannyń resmı bıligi ustalǵandardyń naqty sany men olarǵa taǵylǵan aıyptardyń sıpaty jóninde ázirge rastalǵan derek jarııalaǵan joq.

Osyǵan deıin Iran narazylyq kezinde shamamen 2000 adam qaza tapqanyn moıyndaǵany týraly jazdyq.