Iran prezıdenti Tegerandaǵy sý máselesi kúrdeli ekenin málimdedi

ASTANA. KAZINFORM – Tegerandaǵy sý resýrstary men qorlarynyń azaıýy alańdatarlyq jaǵdaıda. Bul týraly Iran prezıdenti Masýd Pezeshkıan Іshki ister mınıstrliginde gýbernatorlarmen kezdesýinde málimdedi, dep habarlaıdy Anadolu Ajansı.

- Búginde Tegeran sý resýrstarynyń aıtarlyqtaı qysqarýymen betpe-bet kelip otyr, bizdiń qorlarymyz alańdatarlyq jaǵdaıda. Bul daǵdarysty eńserý qoǵamdyq úılestirýsiz múmkin emes. Egjeı-tegjeıli baǵalaý sý qorynyń taýsylǵanyn jáne osy ýaqytqa deıin resýrstardyń durys paıdalanbaǵanyn kórsetip otyr, - dedi Iran prezıdenti.

Ol qazirgi jaǵdaıǵa tabıǵatty nemese basqa adamdardy kinálaýǵa bolmaıtynyn atap ótti.

Pezeshkıan sondaı-aq bul jaǵdaıdyń ótkendegi durys emes sheshimderden týyndaǵanyn atap ótti.

- Biz reforma jolynda jaýapkershilikpen ári muqııat júrýimiz kerek. Bizge sezimtal, ǵylymı jáne kóregen basqarý kerek. Eldi sý daǵdarysynan qutqarý úshin úkimet te, halyq ta osynaý ulttyq protseske barynsha kóńil bólip, belsendi ról atqarýy tıis, - dedi ol.

Bógetterdegi sý deńgeıi Iranda jalǵasyp jatqan qurǵaqshylyq saldarynan tómendedi. Tegeran provıntsııasy sý resýrstary basqarmasynyń 20 shildede taratqan málimdemede Tegerandy qamtamasyz etetin bógetterdegi sý qory sońǵy ǵasyrdaǵy eń tómengi deńgeıge jetkeni eskertilip, halyqty sýdy únemdeýge shaqyrdy.

Buǵan deıin elimizdiń Sý mınıstrligi sýdy únemdep paıdalanýǵa shaqyryp, arnaıy ádistemelik usynystar ázirlegen bolatyn.