Iran prezıdenti el astanasyn Tegerannan kóshirý usynysyn qaıtalady

ASTANA. KAZINFORM — Iran prezıdenti Masýd Pezeshkıan el astanasyn Tegeran qalasynan basqa jerge kóshirý qajettiligi týraly taǵy málimdedi, dep habarlaıdy TASS aqparat agenttigi. 

Fars agenttiginiń habarlaýynsha, prezıdenttiń sheshimine qala halqynyń shamadan tys kóptigi men sý tapshylyǵy sebep boldy. Pezeshkıan megapolıs halqynyń sany óse berse, sý resýrstary barlyq turǵyndy qamtamasyz etýge jetkiliksiz bolatynyn atap ótti.

— Bizde basqa amal joq. Bul qajettilik, — dep málimdedi prezıdent.

Pezeshkıan sondaı-aq bul máseleniń tek Tegeranǵa ǵana emes, Irannyń basqa da birneshe aımaǵyna áser etkenin qosty.

Kazinform úshin arnaıy TASS seriktes agenttigi usynǵan.

Qarasha aıynyń basynda Iran astanasynyń turǵyndaryn aýyzsýmen qamtamasyz etetin negizgi sý kózi eki apta ishinde tartylyp qalýy yqtımal ekenin jazǵan bolatynbyz. 

Sondaı-aq Tegeranda sý tapshylyǵy kúrt artyp, bılik turǵyndardy kóshirý yqtımaldyǵyna amalsyz kónip, evakýatsııaǵa qamdanyp jatqanyn habarladyq. 

Buǵan deıin Iran bıligi qurǵaqshylyqtan zardap shekken aýdandarda jasandy túrde jańbyr jaýdyrý úshin hımııalyq reagentterdi shashyratýǵa kiristi.