Iran meshitterinde nelikten kógildir tas qoldanylady — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Tashkentte «Jibek jolyndaǵy týrızm» jármeńkesi ótti — ÓzA
Tashkenttegi «Central Asian Expo Uzbekistan» halyqaralyq kórme kesheninde «Jibek jolyndaǵy týrızm» atty 30-Tashkent halyqaralyq týrızm jármeńkesi ótti, dep habarlaıdy «ÓzA» aqparat agenttigi.
Habarlamada aıtylýynsha, Ortalyq Azııadaǵy týrızm salasyndaǵy eń aýqymdy alańdardyń biri sanalatyn bul kórme kóptegen elderdiń týrıstik ónimderin tanystyryp, jańa seriktestik baılanystaryn ornatýǵa, halyqaralyq yntymaqtastyq kókjıegin keńeıtýge múmkindik berip keledi.
Atalǵan jármeńkege álemniń túrli aımaqtarynan kelgen 300-ge jýyq kompanııa, sondaı-aq «Hosted Buyers» baǵdarlamasynyń ókilderi qatysty. Týrızm ındýstrııasy úshin mańyzdy kásibı alańǵa aınalǵan shara aıasynda qatysýshylar B2B formatyndaǵy kelissózderge, salalyq dóńgelek ústelderge qatysyp, týrıstik qyzmetter men qolóner týyndylarynyń kórmesin tamashalady.
Jármeńke shamamen 15 myńǵa jýyq jergilikti jáne sheteldik kásibı mamandardy bir alańda toǵystyrdy. Resmı ashylý saltanatynda Ortalyq Azııa jáne Ázerbaıjan elderiniń Týrızm komıtetteriniń basshylary sóz sóılep, qatysýshylardy mereıtoılyq sharamen quttyqtady.
Sondaı-aq osy aptada «ÓzA»-da «Qorǵasta Shyńjań men Ortalyq Azııa jastary festıvali bastaldy» degen taqyryptaǵy aqparat jarııalandy.
Ózbekstandyq BAQ-tyń málimetinshe, Qytaıdyń soltústik-batysyndaǵy Shyńjań Uıǵyr avtonomııalyq ólkesiniń Qorǵas qalasynda «Shyńjań — Ortalyq Azııa jastary óner festıvali» ashyldy.
Qytaı aqparat agenttigine silteme jasap habarlaýynsha, úsh kúnge sozylatyn sharaǵa Qytaı, Qazaqstan, Ózbekstan, Tájikstan, Qyrǵyzstan jáne Túrkimenstannan júzge jýyq jastary qatysyp otyr.
Aıta keteıik, festıval Ortalyq Azııa óneri kórmesimen ashyldy. Ekspozıtsııaǵa qoıylǵan sýretter órkenıetter arasyndaǵy ózara almasý úderisterin beıneleıdi.
Ońtústik dáliz — eń qaýipsiz jáne eń únemdi baǵyt — Eurasia Today
Qytaıdan Eýropaǵa temirjol arqyly júk tasymaldaýdyń eń qaýipsiz jáne eń únemdi baǵyty — Iran arqyly ótetin Ońtústik dáliz, dep jazady «Eurasia Today» aqparat agentti.
«Eurasia Today»-dyń habarlaýy boıynsha bul týraly Iran temir joldarynyń syrtqy saýda jónindegi bas dırektory Shahrıar Naǵızade málimdedi.
Naǵızade jaqynda Ystambulda jasalǵan Iran, Qytaı, Ózbekstan, Túrkııa, Túrikmenstan jáne Qazaqstan arasyndaǵy altyjaqty temirjol kelisimine toqtalyp, osy jyldyń maýsym aıynda Beıjińde Iran arqyly ótetin Shyǵys-Batys kólik dálizin damytýǵa arnalǵan atalǵan elder ókilderiniń kezdesýi ótkenin aıtty.
Ol Qytaıdan Eýropalyq Odaqqa aparatyn úsh kólik dálizine toqtaldy. Birinshisi, onyń aıtýynsha, Mońǵolııa men Reseı arqyly ótetin Soltústik dáliz. Ekinshisi — Qazaqstan arqyly ótip, eki tarmaqqa bólinetin Ortalyq dáliz: Reseıge baratyn temirjol baǵyty jáne Kaspıı teńizi arqyly Ázirbaıjanǵa, Grýzııaǵa, sodan keıin Qara teńizge baratyn mýltımodaldy baǵyt.
Ońtústik dáliz dep atalatyn jáne buryn belsendi bolmaǵan úshinshi dáliz Iran arqyly ótedi. Naǵızade Ońtústik dálizdiń eki myń jyldyq tarıhy bar ekenin, ony Jibek jolynyń dáýirimen salystyrýǵa bolatynyn aıtty.
JI jol polıtsııasy Hanchjoý qalasynda jumysqa turdy — «Halyq gazeti»
3 jeltoqsanda JI trafık basqarý roboty óz jumysyn bastady, dep habarlaıdy Qytaıdyń «Halyq gazeti» basylymy.
Atalǵan BAQ-tyń dereginshe, jaqynda Chjetszıan ólkesiniń Hanchjoý qalasy baǵdarshamdarǵa negizdelgen standartty komandalyq áreketterdi oryndaı alatyn, kórý júıesi arqyly taldaý tehnologııasyna súıenedi. Sol arqyly kólik quraldarynyń ereje buzýyn der kezinde anyqtap, eskertý jasaıtyn «Hangxing No. 1» JI trafık basqarý robotyn iske qosqan.
Sonymen qatar osy aptada «Halyq gazeti» basylymynda «Chendý men Almaty arasynda tikeleı reıs ashyldy» degen aqparat jaryq kórdi.
Qytaılyq BAQ-tyń málimetinshe, Air China jeltoqsan aıynda Sychýan ólkesiniń ortalyǵy Chendý men Qazaqstannyń Almaty qalasy arasyndaǵy tikeleı halyqaralyq baǵytyn resmı túrde iske qosty. Aptasyna baryp-qaıtý baǵyty boıynsha eki reıs jumys jasaıdy. Baǵyt ashylǵannan keıin Chendýdan Almaty halyqaralyq áýejaıyna deıingi jol nebári 3,5 saǵat bolady. Bul tranzıttik ýaqytpen salystyrǵanda keminde 7 saǵat únemdeıdi.
2017 jyly Sychýan ólkesi men Almaty oblysy dos ólke/oblys qarym-qatynasyn ornatý týraly kelisimge qol qoıǵan. Bul Sychýannyń Ortalyq Azııa elimen alǵashqy «dos qala» qarym-qatynasyn ornatýy.
Aıta ketý kerek, sońǵy jyldary Sychýan men Qazaqstan arasyndaǵy ekonomıkalyq jáne saýda yntymaqtastyǵy barǵan saıyn jıileı tústi.
Iran meshitterinde nelikten kógildir tas qoldanylady — ParsToday
Iran meshitteriniń plıtkalaryndaǵy kógildir kók tústiń tereń fılosofııasy bar.
Iran meshitteriniń plıtkalaryndaǵy kógildir tús ıran-ıslam mádenıetine, dinine jáne estetıkasyna negizdelgen tereń, kóp qyrly fılosofııaǵa ıe. Bul tústi aspan men rýhanııattyń sımvoly dep sanaýǵa bolady, dep jazdy ParsToday aqparat agenttigi.
Irandyq BAQ-tyń dereginshe, shyn máninde, kógildir tús aspannyń, sheksizdiktiń jáne jumaqtyń sımvoly bolyp tabylady. Ony meshitterdiń kúmbezderi men qabyrǵalaryn plıtkamen qaptaýda qoldaný aqyl-oı men kózdi joǵary jáne aspanǵa baǵyttaıdy jáne belgili bir maǵynada adamnyń Allamen baılanysyn eske salady. Islam sáýlet ónerinde aspanǵa qaraý jannyń kóterilýiniń jáne rýhanı transtsendenttiktiń sımvoly bolyp tabylady.
— Ekinshi jaǵynan, kógildir tús tynyshtandyratyn áserge ıe. Meshitter sııaqty dinı keńistikterde bul tús aqyl-oıdy shoǵyrlandyrýǵa jáne tynyshtandyrýǵa kómektesedi, duǵa etý men oılanýǵa qolaıly orta jasaıdy, dep jazady ParsToday.
Ankarada «Halyqaralyq Kóne Túrki Tili Sımpozıýmy» bastaldy — TRT
Túrik Til Mekemesi men Ankara Ýnıversıtetiniń Til jáne Tarıh-Geografııa fakýltetiniń yntymaqtastyǵymen uıymdastyrylǵan Halyqaralyq Kóne Túrki Tili Sımpozıýmy 4–5 jeltoqsan kúnderi Ankarada ótýde.
Bul týraly beısenbi kúni Túrkııa Radıo Televızııa portaly habarlady.
«TRT»-nyń dereginshe, Túrkologııa salasynyń jetekshi ǵalymdaryna bas qostyrǵan bul sımpozıýmda kóne túrki tiliniń baı murasy jan-jaqty qarastyrylýda.
Sımpozıýmnyń betasharynda Ankara Ýnıversıteti Til jáne Tarıh-Geografııa fakýltetiniń dekany professor, doktor Irfan Albaırak pen Túrik Til Mekemesiniń tóraǵasy professor, doktor Osman Mert sóz sóıledi.
Irfan Albaırak fakýltettiń 90 jyldyǵyna oraı uıymdastyrylǵan bul sharanyń sımvoldyq máni joǵary ekenin atap ótip, túrki tiliniń tarıhı murasy men mádenı sabaqtastyǵyn saqtaý jolyndaǵy jaýapkershilikke nazar aýdardy. Sondaı-aq ol Atatúriktiń túrki tiline bergen mańyzyn eske salyp, fakýltettiń kóne túrki tili boıynsha 90 jyldyq ǵylymı tájirıbesin aıryqsha atap ótti. Túrki tiliniń ártúrli geografııalyq keńistikterdegi izderin ǵylymı ádistermen zertteý qajettigi de sóz boldy.
Atalǵan BAQ-tyń keltirgen málimetterine súıensek, Túrik Til Mekemesi tóraǵasy professor, doktor Osman Mert óziniń sózinde kóne túrki tilin tek tarıhı kezeń ǵana emes, ulttyń mádenı jadyn saqtaýshy ózek retinde sıpattady. Orhon eskertkishterinen bastap, Uıǵyr jáne Qarahan kezeńderine deıingi kóne mátinder túrki dúnıetanymynyń baǵyt-baǵdaryn aıqyndaıtynyn aıtqan. Sondaı-aq Mert jas zertteýshilerdi bul murany muqııat ári ǵylymı jaýapkershilikpen zertteýge shaqyrdy jáne sımpozıým túrkologııa ádebıetine jańa úles qosatynyna senim bildirdi.
Dúnıe júzindegi eń uzyn jeke áýe joly álem rekordyn jańalady — CNR
20 000 shaqyrym jáne úsh kontınentti qamtıdy. China Eastern Airlines kompanııasynyń álemdegi eń uzyn baǵyty alǵashqy reısin jasap, Ońtústik Amerıkaǵa saıahat jasaý úshin «tikeleı ushý dáýirin» bastady, dep habarlaıdy Qytaıdyń Ortalyq halyq radıosy.
Atalǵan basylymnyń dereginshe, 2025 jyly 4 jeltoqsanda tańǵy saǵat 2:19–da Qytaıdyń shyǵys áýe joldaryn ushaqpen Shanhaı Pýdýng halyqaralyq áýejaıynan ushyp, álemdegi eń uzyn bir jaqty kommertsııalyq baǵyt — Shanhaı Pýdýn — Oklend — Býenos-Aıres — resmı túrde bastaldy.
Jalpy qashyqtyǵy 19 681 shaqyrymdy quraıtyn bul jol álemdegi eń uzyn bir baǵyttaǵy joldyń rekordyn jańartyp qana qoımaı, Qytaı men Ońtústik Amerıka arasyndaǵy saıahat landshaftyn tolyǵymen ózgertip, transshekaralyq týrızm naryǵyna kúshti serpin berdi.