Iran men Qazaqstan arasynda týrızm salasyn keńeıtý kerek – sheteldegi qazaq baspasózi
KAZINFORM HAA sheteldegi qazaq tilinde taraıtyn aqparat kózderine aptalyq sholýyn usynady.
Antalııa sheteldik týrıst qabyldaýda tarıhı rekord jasady – «TRT»
Antalııa ótken jyly 15 mıllıon 689 258 sheteldik týrısti qabyldap, tarıhtyń rekordyn jańartty. Álemniń tartymdy týrıstik ortalyqtarynyń biri sanalatyn qala 2023 jyly týrızmdegi eń jaqsy jyldy bastan ótkerdi, dep habarlady Túrkııa Radıo Televızııa portaly.
Túrkııalyq BAQ-tyń dereginshe, qaladaǵy aldyńǵy rekord 2019 jyly 15 280 763 sheteldik týrıstpen jańarǵan bolatyn.
Oblystyq mádenıet jáne týrızm basqarmasynyń málimetine qaraǵanda, 2023 jyldyń 1 qańtary men 31 jeltoqsany aralyǵynda qalaǵa 15 689 258 sheteldik týrıst kelgen.
Aıta keteıik, ótken jyly Antalııa Reseıden kelgen 3 mıllıon 461 myń 762 týrıstti qabyldaǵan.
Qazaqstandyq stýdentterge Qytaı eli 155 oqý grantyn usynyp jatyr - «Halyq gazeti»
Qytaı úkimeti bakalavrıat, magıstratýra, doktorantýra baǵdarlamalary boıynsha Qazaqstanǵa 155 oqý grantyn usynyp otyr. Bul týraly qytaılyq «Halyq gazeti» basylymy qazaqstandyq «BAQ.KZ»-ke silteme jasap habarlaıdy.
Keltirgen derekterge súıensek, «Halyqaralyq baǵdarlamalar ortalyǵynyń» málimetinshe, Qazaqstan Respýblıkasynyń Bilim jáne ǵylym mınıstrligi men Qytaı Halyq Respýblıkasynyń Bilim mınıstrligi arasyndaǵy 2003 jylǵy 3 maýsymdaǵy bilim berý salasyndaǵy yntymaqtastyq týraly kelisimge sáıkes Qytaı úkimeti 2024-2025 oqý jylyna QHR memlekettik stıpendııasy boıynsha oqýǵa bakalavrıat, magıstratýra, doktorantýra baǵdarlamalarymen 155 bilim grantyn usynady.
Aıta keteıik, oqýda júrgen úmitkerler mektepten (kolledjden, joǵary oqý ornynan) bitirýshiniń mártebesi týraly oqý bitirýdiń josparlanǵan kúnin kórsete otyryp, oqý bólimimen rastalǵan, qytaı nemese aǵylshyn tilderine aýdarmasy bar notarıaldy kýálandyrylǵan anyqtamany usynýy qajet.
Aqparat sońynda Qytaı elinen baryp oqýǵa úmitkerlege qoıylatyn talaptar men grant qandaı shyǵyndardy óteıtini týraly aıtylǵan.
Ózbekstan men Qazaqstandy baılanystyratyn keden beketi keńeıtilmek - «ÓzA»
Ózbekstan men Qazaqstandy baılanystyratyn Tashkent oblysyndaǵy «Ǵıshtkýprık» (Jibek joly) ótkizý keden beketi keńeıtilmek, dep habarlaıdy «ÓzA» aqparat agenttigi.
Atalǵan basylymnyń dereginshe, Tashkent aýdany, «Ǵıshtkýprık» agrofırmasynyń massıviniń kontýrynda ornalasqan memlekettik rezervtegi paıdalanylmaı jatqan 1,81 gektar aýyl sharýashylyǵy jeri «Ǵıshtkýprık» shekara beketin keńeıtý jáne jobalyq qujattar negizinde qosymsha ǵımarattar men qurylystardy salý úshin bólingen. Bul týraly tıisti sheshimge Tashkent oblysynyń ákimi Zoır Mırzaev qol qoıǵan.
Sonymen qatar qaýlyda atalǵan aýmaqta ornalasqan ınjenerlik jelilerdi jyljytý nemese erekshe qorǵalatyn aýmaqty saqtaý jumystaryn júrgizý týraly sheshim qabyldanǵan.
Sondaı-aq, osy aptada «ÓzA»-da «Ózbekstanda júrgizýshi kýáligimen áýe reısinde ushýǵa ruqsat etilmek» degen taqyryptaǵy aqparat jarııalandy.
Ózbekstandyq BAQ-tyń málimetinshe, Uzbekistan Airports quzyryndaǵy áýejaılardyń qyzmeti respýblıkanyń kólik salasyna qatysty qujattarmen, onyń ishinde ózgertýler jáne tolyqtyrýlarmen rettelgen.
Mınıstrler Kabınetiniń 2017 jylǵy 19 maýsymdaǵy «Іshki ister organdary júıesinde memlekettik qyzmet kórsetý sapasyn odan ári arttyrý jáne rásimderdi ońaılatý jónindegi sharalar týraly» 389 sandy qaýlysyna sáıkes jańa ulttyq júrgizýshi kýáligi azamattyń jeke basyn rastaıtyn resmı memlekettik qujat mártebesine ıe.
«Osy málimetterge sáıkes, áýejaıda azamattyń jeke basyn kýálandyratyn qujat retinde tanylatyn jáne jolaýshylarǵa olardy paıdalana otyryp, ishki reısterge tirkelý quqyǵyn beretin qujattardyń (júrgizýshi kýáligi, týý týraly kýáligi, áskerı bılet jáne t.b.) túpkilikti tizbesi pysyqtalýda», delingen Uzbekistan Airports habarynda.
Qytaılyq azamattar vızasyz bara alatyn elder tizimi jarııalandy - CNR
Qytaımen ózara vızasyz qatynaýǵa ruqsat etilgen 20-dan astan eldiń tizimi jarııalandy.
Bul týraly osy aptada Qytaıdyń «Ortalyq halyq radıosynda» habarlandy. Olar mynalar: Taıland, Sıngapýr, Maldıv, Qazaqstan, Antıgýa jáne Barbýda, Albanııa, Birikken Arab Ámirlikteri, Barbados, Bagamy, Belarýs, Bosnııa jáne Gertsegovına, Domınıka, Ekvador, Fıdjı, Grenada, Katar, Mavrıkıı, Serbııa, Seıshel, San-Marıno, Sýrınam, Tonga, Armenııa qatarly elder.
Iran men Qazaqstan arasynda týrızm salasyn keńeıtý kerek - «Parstoday»
Qazaqstandaǵy Iran elshisi Álı Akbar Djoýkar Qazaqstannyń Týrızm jáne sport vıtse-mınıstri Erjan Erkinbaevpen kezdesip, týrızm salasynda yntymaqtastyqty keńeıtý keregin basa aıtty, dep habarlaıdy «Parstoday» aqparat agenttigi.
Irandyq BAQ-tyń keltirgen málimetterine súıensek, Álı Akbar Djoýkar Erjan Erkinbaevpen kezdesýinde ekijaqty qarym-qatynasta týrızmniń mańyzyna toqtalǵan. Onyń aıtýynsha, qazirgi jaǵdaıda eki el arasyndaǵy týrıster sany osy saladaǵy shynaıy áleýetterge saı emes. Sondyqtan «Iran men Qazaqstannyń týrıstik áleýetterin eskere otyryp, týrıster sanyn arttyrý úshin tıisti organdar kóbirek talpynys jasaýy kerek», - deıdi Álı Akbar Djoýkar.
Iran elshisi týrızm salasyndaǵy qazirgi jaǵdaıdy eki eldiń múddesine saı ózgertý úshin jańa bastamalar men ıdeıalar aıtyp, Qazaqstan basshylaryn jaqyn bolashaqta Iranda týrızm salasynda ótetin sharalarǵa belsendi qatysýǵa shaqyramyz degen.
Erjan Erkinbaev ta eki eldiń týrıstik qatynasyn damytýǵa bar kúshin salatynyn aıtqan.
Gýlanıýı aralynda 1,5 ǵasyrdyń kýási bolǵan eski ǵımarattar bar – «Halyq gazeti»
Qytaıdyń Fýtszıan ólkesi Sıamen qalasynda ornalasqan Gýlanıýı araly (aǵylshyn tilinde Kulangsu) tórt mezgili kóktemdeı jaıma shýaq bolyp turatyn «teńizdegi saıabaq» qana emes, sonymen qatar óziniń kóptegen tarıhı ǵımarattaryna baılanysty «sáýlet murajaıy» degen tamasha atymen el ishi syrtynan keletin týrısterdi baýraıdy, dep jazady qytaılyq «kaz.people.cn».
Atalǵan BAQ-tyń málimetinshe, Sıamendegi Gýlanıýı aralynyń tarıhy onyń erekshe mádenı landshaftyn jasady. 1844 jyldan bastap 13 el Gýlanıýı aralynda konsýldyqtar ashty, al Ulybrıtanııa, Amerıka Qurama Shtattary, Frantsııa jáne basqa elder de osynda shirkeýler saldy, mektepter, aýrýhanalar, sheteldik bankter ashty. Osylaısha, Gýlanıýı aralynda batystyq stıldegi qoǵamdyq ǵımarattar men halyq qoldanysyndaǵy ǵımarattar saqtalyp qaldy. Aralda 19 ǵasyrdyń aıaǵynan 20 ǵasyrdyń birinshi jartysyna deıin salynǵan barlyq túrdegi 1000-nan astam ǵımarat bar. Bul shyǵys jáne Batys sáýlet mádenıetiniń ókilderi toǵysqan orta.
Aıta keteıik, 2017 jyly «Gýlanıýı araly: halyqaralyq tarıhı qaýymdastyǵy» Dúnıejúzilik mura tizimine engizilgen eken.
