Iran MAGATE-men jańa formatta yntymaqtastyq ornatýǵa daıyn
ASTANA. KAZINFORM — Iran bıligi Halyqaralyq atom energııasy agenttigimen (MAGATE) yntymaqtastyqty tolyq toqtatpaǵanyn, alaıda aldaǵy ýaqytta ol jańa formatta júzege asyrylatynyn málimdedi, dep habarlaıdy TASS.
Bul týraly Iran Islam Respýblıkasynyń Syrtqy ister mınıstri Abbas Aragchı sheteldik elshilikter men dıplomatııalyq mıssııalar basshylarymen kezdesý barysynda aıtty.
Iran AQSh-pen ıadrolyq kelisim boıynsha kelissózderge «naǵyz múmkindik» berýge daıyn
— Biz agenttikpen yntymaqtastyqty toqtatqan joqpyz, biraq ol jańa sıpatta jalǵasady. Bul — qazirgi jaǵdaı men oryn alǵan oqıǵalar aıasynda tabıǵı ózgeris, — dedi Aragchı.
Onyń aıtýynsha, Iran aýmaǵynda MAGATE tarapynan ınspektsııa júrgizýge qatysty talaptar eldiń Ulttyq qaýipsizdik jónindegi Joǵarǵy keńesinde ár jaǵdaıǵa baılanysty jeke qaralady jáne qaýipsizdik múddeleri eskeriledi.
Mınıstrdiń sózine qaraǵanda, Iran MAGATE ınspektorlarynyń ıadrolyq nysandardaǵy qaýipsizdigine de alańdaýly. Sebebi Izraılmen bolǵan soǵystan keıin keıbir nysandarda jarylmaǵan snarıadtar qalýy múmkin.
Aıta keteıik, 2 shildede Iran prezıdenti Masýd Pezeshkıan Tegeran men MAGATE arasyndaǵy yntymaqtastyqty toqtatý týraly zańǵa qol qoıdy. Qujatqa prezıdent qol qoıǵan sátten bastap zań kúshine enedi jáne mindetti túrde oryndalýy tıis.
Aıta ketelik MAGATE ınspektorlary Irannan ketken edi.