Iran Izraılge zymyran atty: elde áýe dabyly jarııalandy

ASTANA. KAZINFORM — Izraılde áýe dabyly jarııalandy, armııa Iran tarapynan zymyrandardyń ushyrylǵanyn tirkegenin habarlady, dep jazady VVS.

Izraıl Qarýly kúshteri (TsAHAL) Iran aýmaǵynan zymyran ushyrylǵanyn jáne olardyń Izraılge qaraı baǵyt alǵanyn málimdedi. Barlyq turǵynǵa baspanaǵa jasyrynýǵa jáne «erekshe buıryq berilgenge deıin sol jerde qalýǵa» keńes berildi, dep habarlaıdy AFP.

AFP agenttiginiń málimetinshe, Ierýsalımde áýe dabylynyń sırenalary qosyldy.

Zymyrandardyń Izraılge qaraı ushyrylǵanyn Irannyń memlekettik telearnasy da rastady. Sonymen qatar, Irannyń IRNA agenttigi Izraılge qarsy zymyran shabýylynyń ekinshi tolqyny bastalǵanyn habarlady.

Eske salaıyq, jumaǵa qaraǵan túni Izraıl Iran aýmaǵyna jappaı soqqy jasady. Bul shabýyldyń saldarynan Islam revolıýtsııasy saqshylar korpýsynyń (KSIR) birqatar joǵary laýazymdy komandırleri men ıadrolyq fızıka salasyndaǵy ǵalymdar qaza tapty. Iran sondaı-aq Natanz qalasyndaǵy ıadrolyq nysannyń zaqymdanǵanyn rastady, biraq radıatsııanyń taralý faktisin joqqa shyǵardy.

AQSh Memlekettik hatshysy Izraıldiń Iranǵa qarsy jasaǵan soqqylaryn «birjaqty áreket» dep atap, oǵan Aq úıdiń qatysy joq ekenin málimdedi.

Izraıldiń Iranǵa jasaǵan soqqysynan keıin munaı baǵasy kúrt kóterildi.