Iran Izraıl agenti bolýy múmkin 700 adamdy ustaǵanyn habarlady
ASTANA.KAZINFORM - Iran bıligi jasaǵan ólim jazalary men jappaı tutqyndaý Izraılmen 12 kúnge sozylǵan qaqtyǵys saldarynyń biri boldy, dep habarlaıdy Kazinform agenttiginiń menshikti tilshisi.
Fars News agenttiginiń habarlaýynsha, Irannyń barlaý qyzmeti Izraıl múddesi úshin tyńshylyq áreketter jasady degen kúdikpen 700-ge jýyq adamdy ustady.
- Jedel derekter men turǵyndardan túsken habarlamalar negizinde barlaý jelileriniń quramynda bolǵan jaldamalylar anyqtalyp, qamaýǵa alyndy, - delingen habarlamada.
Operatsııalar barysynda jarylǵysh zattar, qashyqtan basqarý júıeleri men tyńshylyq qurylǵylar tárkilengeni habarlandy. Buǵan qosa, ırandyq tarap Izraıl barlaýymen baılanysy bar dron qurastyratyn jerasty sheberhanalary tabylǵanyn málimdeıdi.
Qaýipsizdik qyzmetteri Kermanshah, Isfahan, Hýzestan, Fars jáne Lorestan provıntsııalarynda operatsııa júrgizgenin habarlady. Buqaralyq aqparat quraldarynyń habarlaýynsha, el astanasynda da jeke tutqyndaýlar bolǵan, biraq Tegeran boıynsha resmı statıstıka jarııa etilmegen. Sonymen qatar Batys Ázerbaıjan provıntsııasynyń ákimshilik ortalyǵy Ýrmııa qalasynyń túrmesinde Mossadpen yntymaqtasa jumys istegen úsh adam ólim jazasyna kesildi.
Three Mossad Spies Executed in Iranhttps://t.co/WH8BFdPmKa pic.twitter.com/x7CdEN36cC
— Fars News Agency (@EnglishFars) June 25, 2025
Idrıs Álı, Azad Shodjaı jáne Rasýl Ahmad Rasýl qarý-jaraq kontrabandasy jáne Irandaǵy joǵary laýazymdy sheneýnikti óltirýge qatysy bar degen aıyptarmen «jerdegi jemqorlyq» jáne «Qudaıǵa qarsy soǵys» úshin kináli dep tanyldy.
- Úsheýi de kórshi eldegi Izraıl barlaý qyzmetiniń qyzmetkerimen baılanysta bolǵan, - delingen is materıalynda.
Izraıldiń arnaıy operatsııalary
Izraıl qaqtyǵys kezinde arnaıy kúshteriniń Iranda áreket etkenin rastady.
Izraıl qorǵanys kúshteri (TsAHAL) bas shtabynyń basshysy Eııal Zamır Irannyń júzdegen zymyran tasyǵyshynyń isten shyqqanyn jáne soqqylardyń áýe keńistigin jedel baqylaýǵa múmkindik bergenin aıtty. Qatysqan bólimsheler týraly málimetter jarııalanǵan joq.
Izraıldiń Mossad barlaý qyzmeti sırek jarııalaǵan málimdemesinde operatsııany «tarıhı» dep atap, Amerıka Qurama Shtattaryna yntymaqtastyǵy úshin alǵys bildirdi, dep habarlaıdy The Times of Israel.
Agenttik basshysy Devıd Barnea ırandyq qaýip «aıtarlyqtaı beıtaraptandyrylǵanyn» aıtyp, ırandyq jobalardy baqylaýdy jalǵastyrýǵa ýáde berdi.
Tegerandaǵy memlekettik jerleý rásimderi
Iran bıligi Islam revolıýtsııasy Saqshylar korpýsynyń qolbasshylary men qaqtyǵys kezinde qaza tapqan ǵalymdardy memlekettik jerleý rásimin jarııalady. Rásim senbige josparlanǵan jáne joǵary laýazymdy tulǵalardyń qatysýymen Tegeranda ótedi.
Irandyq derekkózderdiń habarlaýynsha, soqqynyń birinshi kúni qaza tapqan SІQK qolbasshysy Hosseın Salamımen bólek qoshtasý rásimi ótedi. Iran aqparat quraldary qaza tapqandardy «qarsylyq sheıitteri» dep atap, birneshe provıntsııada jappaı eske alý sharalary ótetinin habarlady.
Irannyń Densaýlyq saqtaý mınıstrligi 13-25 maýsym aralyǵynda Izraıldiń eldegi soqqylarynan 627 adam qaza taýyp, keminde 4870 adam jaralanǵanyn habarlady.
Mınıstrliktiń málimdemesine sáıkes, qurbandardyń 86%-y oqıǵa ornynda qaza tapty, al Tegeran, Kermanshah, Hýzestan, Lorestan jáne Isfahan provıntsııalary eń kóp zardap shekken.
Seısenbige qaraǵan túni AQSh prezıdenti Donald Tramp atysty toqtatý týraly kelisimdi jarııalaǵannan keıin Iran men Izraıl arasyndaǵy qaqtyǵystar toqtatyldy.
Aıta keteıik, Iran Parlamenti MAGATE-men yntymaqtastyqty toqtatý týraly zań jobasyn maquldady.