Iran eshqashan bas ımeıdi – aıatolla Hameneı
ASTANA. KAZINFORM — Irannyń joǵarǵy kóshbasshysy aıatolla Álı Hameneı teleúndeýinde Izraıl men óńirdegi amerıkalyq bazaǵa jasalǵan soqqylardy ózin-ózi qorǵaý áreketi dep baǵalap, AQSh-tyń berilý týraly úndeýin qatań aıyptady.
Beısenbi kúni telearna arqyly jasaǵan málimdemesinde aıatolla Hameneı Iran Izraıl men AQSh-qa aýyr soqqy berip, syrtqy agressııaǵa qarsy tura alatynyn dáleldegenin aıtty.
— Islam Respýblıkasynyń soqqylary saldarynan Izraıl eseńgirep qaldy. Irannyń qorǵanys shebin buzyp, áskerı jáne azamattyq nysandarǵa soqqy bere alatynyn olar ne elestete alǵan joq, ne esepteı alǵan joq. Bul – qarýly kúshterimizdiń erligi men olardy qoldaǵan halqymyzdyń arqasy, — dedi Hameneı.
Ol sondaı-aq AQSh-tyń áreketin nátıjesiz dep baǵalady. Onyń aıtýynsha, Vashıngton Izraıldiń kúıreýine jol bermeý úshin janjalǵa aralasqanymen, naqty maqsattarǵa jete almaǵan.
Iran basshysy Qatardaǵy amerıkalyq «Ál-Ýdeıd» áskerı bazasyna jasalǵan soqqyny erekshe atap ótti. Onyń aıtýynsha, bul – AQSh-qa berilgen naqty jaýap boldy.
— Respýblıka AQSh-tyń aımaqtaǵy negizgi bazalarynyń birin – «Ál-Ýdeıdti» nysanaǵa alyp, aýyr soqqy jasady. Buǵan deıin óz soqqylarynyń aýqymyn ásirelegender endi bizdiń jaýabymyzdyń mańyzyn tómendetýge tyrysyp jatyr. Biraq Iran qajet bolsa, óńirdegi AQSh-tyń strategııalyq nysandaryna soqqy bere alatynyn kórsetti. Eger agressııa qaıtalansa, onyń quny qymbatqa túsedi, — dedi ol.
Hameneı óz sózinde el ishindegi birlikti de erekshe atap ótti. Onyń aıtýynsha, 90 mıllıon halyq armııany bir aýyzdan qoldady, bul – ulttyq kemeldik pen saıası saýattylyq belgisi.
Sondaı-aq, ol AQSh-tyń ustanymyn qatań synǵa aldy. Hameneı Vashıngtonnyń shynaıy maqsaty – ıadrolyq baǵdarlama emes, Irandy tolyq baǵyndyrý ekenin aıtty.
— AQSh prezıdenti «Iran berilýi tıis» dedi. Bul - ıadrolyq sala týraly emes, tikeleı berilý týraly talap. Myńjyldyq tarıhy men mádenıeti bar ultqa mundaı sóz aıtý – qorlaý. Burynǵy ákimshilikter bul maqsatty demokratııa, adam quqyqtary, áıelder nemese tehnologııa syndy jeleýlermen búrkemelese, qazir barlyǵy ashyq aıtylyp otyr, — dedi ol.
Hameneı Iran halqy AQSh-pen qaqtyǵystyń túp-tórkini – Irandy tize búktirý talabynda jatqanyn túsinýi tıis ekenin aıtyp, bul talaptyń eshqashan oryndalmaıtynyn kesip aıtty.
— Iran eshqashan bas ımeıdi. Bul el – myqty, mádenıeti baı memleket. Mundaı eldi baǵyndyrý talabyn qoıý – aqymaqtyq ári orynsyz, — dedi ol.
Sóziniń sońynda Hameneı qarýly kúshterge alǵys aıtyp, qaza tapqan qolbasshylar men ǵalymdardyń rýhyna taǵzym etti. Sonymen birge, el bolashaǵyn «qudaıdyń qoldaýy men meıirimine» tapsyratynyn aıtty.
Buǵan deıin Iran Izraıl agenti bolýy múmkin 700 adamdy ustaǵanyn habarlady.