Iran AQSh-pen kelissózderge daıyndalyp jatyr

ASTANA.KAZINFORM - Tegeran Vashıngtonmen qarym-qatynasynyń shıelenisip turǵan tusynda dıplomatııalyq manevrlerge daıyn ekeni týraly belgi berdi, dep habarlaıdy Kazinform agenttiginiń menshikti tilshisi. 

Iran prezıdenti Masýd Pezeshkıan qaýip-qater men negizsiz talap bolmaǵan jaǵdaıda Qurama Shtattarmen yqtımal kelissózderge daıyndyq júrgizý jóninde syrtqy ister mınıstrine buıryq bergenin habarlady. Ol bul týraly seısenbi kúni X áleýmettik jelisinde jazdy.

- AQSh prezıdentiniń kelissóz júrgizý týraly usynysyna jaýap berýdi talap etetin aımaq elderiniń úndeýlerin eskere otyryp, men syrtqy ister mınıstrine ádil jáne teń kelissóz júrgizý úshin qolaıly atmosfera jasaýdy tapsyrdym, - dep atap ótti Pezeshkıan.

Ol kelissózder protsesi Irannyń ulttyq múddesi aıasynda jáne «qadir-qasıet, saqtyq jáne oryndylyq» erejelerine negizdelýi kerek ekenin atap ótti.

Bul málimdeme ótken aıda Irandaǵy úkimetke qarsy narazylyq aktsııalarynyń qatygezdikpen basylýynan keıin qarym-qatynastyń kúrt nasharlaýy aıasynda Tegerannyń Vashıngtonmen dıplomatııalyq dıalogty qarastyrýǵa daıyn ekendigi týraly alǵashqy tikeleı belgisi boldy.

Baıqaýshylar prezıdenttiń bul qadamy buryn AQSh-pen kelissóz júrgizý múmkindigin ashyq túrde qabyldamaǵan Irannyń Joǵarǵy kósemi Álı Hameneımen kelisimniń belgisi dep sanaıdy.

Alaıda, kelisimge qol jetkizý perspektıvalary belgisiz. AQSh prezıdenti Donald Tramp buǵan deıin kelissózder Iranǵa, sonyń ishinde onyń ıadrolyq baǵdarlamasyna qoıylatyn talaptardy qamtıtynyn málimdegen bolatyn. Maýsym aıynda Izraıl Iranǵa qarsy bastaǵan 12 kúndik soǵys kezinde AQSh Irannyń úsh ıadrolyq nysanyna soqqy berdi.

Biz buǵan deıin AQSh pen Iran osy aptada Ystanbulda Irannyń ıadrolyq jáne zymyran baǵdarlamasy týraly kelissóz ótkizýi múmkin ekenin habarlaǵan bolatynbyz.