Iran 11 tamyzda MAGATE bas dırektorynyń orynbasarymen kelissóz júrgizedi

ASTANA. KAZINFORM — Iran bıligi 11 tamyz kúni Atom energııasy jónindegi halyqaralyq agenttikpen yntymaqtastyqtyń yqtımal aıasyn talqylaıdy. Bul týraly eldiń syrtqy ister mınıstri Abbas Aragchı málimdedi, dep jazady TASS.

— Erteń (11 tamyz — red.) MAGATE-men kelissózder ótedi, onda yntymaqtastyq sheńberi aıqyndalady. Agenttik bas dırektorynyń orynbasary Rafael Grossıdiń Tegeranǵa kelýi kútilýde, — dep keltirdi Aragchıdiń sózin Mehr agenttigi.

Onyń aıtýynsha, eger taraptar naqty kelisimge kelmese, ırandyq ıadrolyq nysandarǵa tekseris júrgizilmeıdi.

Aıta keteıik, 13 maýsymǵa qaraǵan túni Izraıl Iranǵa qarsy áskerı operatsııa bastaǵan. Bir táýlikten keıin Iran jaýap retinde qarymta soqqy jasaǵan. AQSh qaqtyǵys kúsheıgennen toǵyz kún ótken soń aralasyp, Isfahan, Natanz jáne Fordo qalalaryndaǵy ırandyq ıadrolyq nysandarǵa soqqy bergen.

23 maýsymda Iran Qatardaǵy Al-Ýdeıd áýe bazasyn — Taıaý Shyǵystaǵy eń iri amerıkalyq áskerı nysandy — zymyranmen atqylaǵan. 24 maýsymda AQSh prezıdenti Donald Tramp Izraıl men Iran atysty toqtatý rejımin ornatýǵa keliskenin habarlady.

MAGATE tarapynan Izraıl men AQSh-tyń Iran nysandaryna jasaǵan shabýyldaryn aıyptamaýy respýblıka ishinde qatty syn men narazylyq týdyrdy. Bul uıymnyń qyzmeti saıasılandy degen aıyptar da aıtyldy.

2 shildede Iran prezıdenti Masýd Pezeshkıan eldiń MAGATE-men yntymaqtastyǵyn toqtatý týraly zańǵa qol qoıdy. Al 22 shildede SІM basshysy Abbas Aragchı bolashaqta MAGATE ınspektorlarynyń Iranǵa oralýy múmkin ekenin joqqa shyǵarmaıtynyn jetkizdi.

Shildeniń sońyna qaraı Iran Syrtqy ister mınıstriniń orynbasary Kazem Garıbabadı Atom energııasy jónindegi halyqaralyq agenttiktiń (MAGATE) tehnıkalyq delegatsııasy aldaǵy eki-úsh apta ishinde Iranǵa baratynyn aıtty.