Iraktaǵy saýda ortalyǵynda bolǵan órtten qaza tapqandardyń sany 60-qa jetti

ASTANA. KAZINFORM – Iraktaǵy «Hypermarket» saýda ortalyǵynda bolǵan órtten kóz jumǵan adamdardyń sany 50-den 60-qa deıin kóbeıdi, dep jazady Al Jazeera. 

Provıntsııa gýbernatory Mohammed ál-Maehanyń aıtýynsha, qazir órttiń shyǵý sebebi anyqtalyp jatyr. Bul rette ǵımarat ıesi men saýda úıiniń ıesine qatysty qylmystyq ister qozǵalyp úlgerdi. Qoıylǵan aıyptardyń naqty tujyrymy áli jarııalanǵan joq. 

Úsh kúndik qaraly kún jarııalanyp, oqıǵaǵa qatysty dereý tergeý bastaldy, onyń nátıjesi keıinirek jarııalanady. 

Áleýmettik jelidegi oqıǵa ornynan túsirilgen vıdeoda órttiń bes qabatty ǵımaratty, onyń ishinde gıpermarket pen meıramhanany qalaı sharpyǵanyn kórýge bolady. 

Eske sala keteıik, buǵan deıin Irakta saýda ortalyǵynda bolǵan órtten 50 adam kóz jumǵanyn habarlaǵan edik.