Irakta sý tapshylyǵynan egis alqaptary ıgerilmeı qaldy

ASTANA. KAZINFORM – Irak úkimeti eldegi sý qorynyń qazirgi kólemi keıingi 80 jyldaǵy eń tómen mejege kemigenin málimdedi. Ótken qysta jaýyn-shashyn kúrt azaıǵandyqtan jáne ózenderdiń joǵarǵy aǵysyndaǵy bógender sý aǵynyna baqylaýdy kúsheıtkendikten, Irakta sý tapshylyǵy kúrt ýshyqty. 

Lianhe Zaobao basylymynyń habarlaýynsha, Iraktyń Sý resýrstary mınıstrliginiń resmı ókili Haled Shammar 25 mamyr kúni jaz shyqqanda eldegi sý qoımalarynda kem degende 18 mıllıard tekshe metr sý bolýǵa tıis ekenin aıtty.

– Alaıda qazir nebári shamamen 10 mıllıard tekshe metr sý jınalǵan… Byltyr bizdiń strategııalyq qorymyz budan eki ese kóp bolǵan. Sońǵy 80 jylda mundaı tómen kórsetkish tirkelgen emes, - dedi ol. 

Irak egis alqaptaryn ejelden Tıgr men Efrat ózenderiniń sýymen sýaryp keledi. Alaıda sońǵy jyldary qos ózenniń sý kólemi azaıa bastaǵan. Shammardyń aıtýynsha, qazirgi ýaqytta Irak alýǵa tıisti sýdyń tek 40 paıyzyna ǵana qol jetkizip otyr. 

Buǵan deıin BUU Irakty klımattyń ózgerýinen eń kóp zardap shegýi múmkin bes eldiń qataryna qosqan. 

Sý tapshylyǵyna jaýyn-shashynnyń azdyǵymen qatar, Túrkııa men Iran aýmaǵynda salynyp jatqan bógetter de sebep bolyp otyr. Bógender Irakqa keletin sý kólemin odan ári azaıtyp, sý tapshylyǵyn údete túsken. 

Qýańshylyq saldarynan fermerler egis alqaptaryn bos tastaýǵa májbúr. Úkimet te aýyl sharýashylyǵyna paıdalanylatyn jer kólemin shekteýge kirisip, aýyzsýmen qamtýdy basty orynǵa qoıyp otyr. Bıyl bılik shamamen 375 myń gektar kógaldandyrylǵan aýylsharýashylyq alqabyn saqtap qalýdy kózdep otyr, bul negizinen astyqqa emes, ekologııalyq jasyl jelekke arnalǵan aımaq. Al ótken jyly egis alqaptarynyń aýdany shamamen 250 myń gektarǵa jetip, oǵan júgeri, kúrish, jemis aǵashtary, t.b. daqyldar egilgen bolatyn.

Buǵan deıin Ózbekstanǵa alǵash ret jasandy jańbyr jaýǵyzatyn qurylǵy jetkizilgenin jazǵan edik.